ओतूर परिसरात सात दिवसांच्या गणरायाला निरोप

ओतूर, ता. २ : ओतूर (ता. जुन्नर) व परिसरातील गावांमध्ये सार्वजनिक गणेश मंडळांच्या मूर्ती, तसेच शेकडो घरगुती गणेश मूर्तींचे सातव्या दिवशी मोठ्या थाटामाटात विसर्जन करण्यात आले.
याबाबत ओतूर पोलिस ठाण्याचे सहाय्यक पोलिस निरीक्षक एल. जी. थाटे यांनी माहिती दिली की, ओतूर पोलिस ठाण्याच्या हद्दीत सातव्या दिवशी एकूण पंचेचाळीस सार्वजनिक गणेश मंडळांच्या गणपती मूर्तींचे भक्तिमय वातावरणात विसर्जन केले. त्यात ओतूरमध्ये एकूण नऊ सार्वजनिक गणेश मंडळांचा समावेश होता.
ओतूरसह उदापूर, डिंगोरे, पिंपळगाव जोगा, कोळवाडी, सितेवाडी, मढ, करंजाळे, खुबी, खरेश्‍वर, सांगनोरे, कोपरे, मांडवे, मुथाळणे, चिल्हेवाडी, पाचघार, आंबेगव्हाण, रोहोकडी, डुंबरवाडी, खामुंडी, नेतवड, माळवाडी, बल्लाळवाडी, आलमे या व इतर गावांत घरगुती शेकडो गणेश मूर्तींचे गणेशभक्तांनी सातव्या दिवशी पुष्पावती व मांडवी नदीत विसर्जन केले. गावागावांत घरगुती गणपतींची विसर्जन मिरवणूक पारंपरिक वाद्यात काढलेली दिसून आली. सर्व गावांमध्ये गणपती विसर्जन मिरवणुकीत कोणताही अनुचित प्रकार घडू नये म्हणून ओतूरचे सहाय्यक पोलिस निरीक्षक थाटे यांच्या मार्गदर्शनाखाली चोख बंदोबस्त ठेवण्यात आला होता.