ओतूर येथे दिवसाढवळ्या शेतकऱ्यावर हल्ल्यात

ओतूर, ता. १६ : येथील रहाटी मळा येथे दिवसाढवळ्या बिबट्याने हल्ला करून पायी चाललेल्या शेतकऱ्याला जखमी केले आहे. ही घटना मंगळवारी (ता.१६) दुपारी सव्वाचारच्या सुमारास घडली.
विनोद बबन चौरे (वय ४८) असे जखमी झालेल्या शेतकऱ्याचे नाव आहे. ओतूर (ता. जुन्नर) येथील राहटी मळ्यातील पाण्याची मोटार बंद करून चौरे हे पायी चालत येत असताना अचानक बिबट्याने त्यांच्यावर हल्ला करून चौरे यांना जखमी केले. बिबट्याने त्यांच्या डाव्या पायाला चावा घेतला असून त्यांच्या मांडीला चार दात लागले आहे. नंतर त्यांना तातडीने ओतूर प्राथमिक आरोग्य केंद्रात उपचारासाठी दाखल करण्यात आले. डॉ. श्रीहरी सारोक्ते यांच्या मार्गदर्शनाखाली डॉ. प्रशांत गोरे व डॉ. वैष्णवी ठिकेकर यांनी त्यांच्यावर प्राथमिक उपचार केले. त्यानंतर त्यांना बिबट प्रतिबंधक लस देण्यासाठी नारायणगाव येथे विघ्नहर हॉस्पिटलला नेण्यात आले आहे. ही घटना समजताच ओतूर वनविभागाचे वनपरिक्षेत्र अधिकारी चैतन्य कांबळे यांच्या मार्गदर्शनाखाली वनरक्षक विश्वनाथ बेले व इतर कर्मचारी यांनी प्राथमिक आरोग्य केंद्रात जाऊन जखमी चौरे यांची भेट घेऊन घटनेची माहिती घेतली.तसेच त्यांना बिबट प्रतिबंधक लस देण्यासाठी नारायणगाव येथे नेण्यात आले.