सेवानिवृत्त मुख्याध्यापकास ओतूर पोलिसांमुळे दिलासा

ओतूर, ता. ९ : सेवानिवृत्त मुख्याध्यापकांची अपहार झालेली १ लाख ६० हजार रुपये रक्कम त्यांना परत मिळवून देण्यात ओतूर (ता. जुन्नर) पोलिसांना यश आले.
याबाबत सहायक पोलिस निरीक्षक एल. जी. थाटे यांनी माहिती दिली की, १९ मार्च २०२४ ते २० जून २०२५दरम्यान विष्णू देवराम दाते (रा. आणे, ता. जुन्नर) या सेवानिवृत्त मुख्याध्यापकांची त्यांच्या ७व्या वेतन आयोगाच्या तिसऱ्या व चौथ्या हप्त्याची एकूण रक्कम १ लाख ६० हजार ३०१ रुपये चुकून चिंतामण मारुती तळपे (रा. केवाडी, ता. जुन्नर) यांच्या बँक खात्यावर जमा झाली होते. दाते यांनी त्यांना वेळोवेळी सदरची रक्कम शाळेच्या बँक खात्यावर जमा करण्याबाबत सांगितले. मात्र, त्यांनी सदरची रक्कम स्वतःच्या फायद्याकरिता वापरून अपहार केला. याबाबत ओतूर पोलिस ठाण्यात विष्णू दाते यांनी २० जून २०२५ रोजी फिर्याद दिली. त्यानुसार गुन्हा दाखल करून पुढील तपास पोलिस हवालदार आनंदा भवारी यांच्याकडे देण्यात आला होता. त्याचा तपास करून तळपे यांच्याकडून लाख ६० हजार ३०१ रुपये रोख रक्कम जप्त केली. ती ८ जानेवारी २०२६ रोजी ओतूर पोलिसांनी दाते यांना परत केली आहे. या गुन्ह्याचा तपास पोलीस हवालदार आनंदा भवारी, भारती भवारी, विलास कोंढावळे यांनी केला.