कोपरे परिसरातून बिबट मादी जेरबंद

ओतूर, ता‌. २२ ः कोपरे (ता. जुन्नर) येथे बुधवारी (ता. २१) रात्री बिबट मादी जेरबंद करण्यात वनविभागाला यश आले असल्याची माहिती ओतूरचे वनक्षेत्र अधिकारी चैतन्य कांबळे व वनपाल सचिन मोढवे यांनी दिली.
याआधी मुथाळणे गावच्या हद्दीतील शासकीय आश्रमशाळेजवळ लावण्यात आलेले पिंजऱ्यात वेळोवेळी ३ बिबटे जेरबंद केले आहे. मागील २७ दिवसांत या परिसरात जेरबंद केलेला हा चौथा बिबट्या आहे. बुधवारी कोपरे गावच्या हद्दीत बिबट्याचा उपद्रव वाढल्याने ग्रामस्थांच्या मागणीनुसार पिंजरा लावला होता. या पिंजऱ्यात रात्री १० वाजण्याच्या दरम्यान बिबट मादी जेरबंद झाली. याबाबत माहिती मिळताच वनक्षेत्र अधिकारी चैतन्य कांबळे यांच्या मार्गदर्शनाखाली वनपाल सचिन मोढवे, वनरक्षक कोमल डाखोरे, वनमजूर सुभाष डामसे यांनी घटनास्थळी जाऊन बिबट मादीला पिंजऱ्यासह ताब्यात घेतले. या बिबट्याला माणिकडोह बिबट निवारा केंद्रात दाखल केले आहे.