‘मराठी माणूस एकत्र आल्यास बाळासाहेबांना खरी मानवंदना’

ओझर : ‘‘महाराष्ट्रातील समस्त मराठी माणूस जर गटतट बाजूला ठेऊन एकत्र येऊन दिल्लीत बसलेल्या गुजराती व्यापाऱ्यांच्या छाताडावर बसला, तर हिंदू हृदयसम्राट स्व. बाळासाहेब ठाकरे यांना खरी मानवंदना ठरेल,’’ असे मत खासदार संजय राऊत यांनी ओझर येथील पत्रकार परिषदेत व्यक्त केले.
उद्धव आणि राज ठाकरे हे बंधू एकत्र कधी येतील, या पत्रकारांच्या प्रश्नावरही त्यांनी हे स्पष्टीकरण दिले. सर्वोच्च न्यायालयाने स्थानिक स्वराज्य संस्थांच्या निवडणुका घेण्याबाबतचे आदेश दिल्यामुळे कार्यकर्ते व पदाधिकाऱ्यांना भेटून चर्चा करण्यासाठी दौरे सुरू असल्याचे त्यांनी सांगितले. लोकसभा, विधानसभेप्रमाणेच स्थानिक स्वराज्य संस्थेच्या निवडणुका महाविकास आघाडी एकत्रित मिळून लढण्याचा आमचा प्रयत्न राहील, असेही ते म्हणाले.
छगन भुजबळ यांना मिळालेल्या मंत्रीपदाबाबत ते म्हणाले, ‘‘भुजबळ हे अजित पवार यांनी चोरलेल्या पक्षात आहेत. मोदी, शहा व देवेंद्र फडणवीस यांचे नेतृत्व त्यांनी स्वीकारले आहे. भाजपशी सोयरीक केलेला नेता कालांतराने सरपटणारा प्राणी होतील. गद्दारांसाठी घटनादुरुस्ती करून भाजप एका राज्यात चार मुख्यमंत्री देखील करू शकतात.’’