ओझर गणपतीच्या दर्शनासाठी भाविकांच्या रांगा

ओझर, ता. १४ : अष्टविनायकांतील मुख्य स्थान असलेल्या श्रीक्षेत्र ओझर (ता. जुन्नर) येथे विघ्नहर गणपतीच्या दर्शनासाठी भाविकांनी रांगा लावल्या होत्या. संकष्टी चतुर्थीनिमित्त मंदिरामध्ये फुलांची आकर्षक आरास करण्यात आली होती. विघ्नहराला रेशमी जरीचा पोशाख तसेच सोन्याचे अलंकार परिधान करण्यात आले होते. श्री विघ्नहर गणपती देवस्थान ट्रस्टचे उपाध्यक्ष तुषार कवडे, विश्वस्त विनायक मांडे, संतोष कवडे, शिल्पा जगदाळे यांच्या उपस्थितीत ‘श्रीं’चा महाअभिषेक झाला. राज्याचे महसूलमंत्री चंद्रशेखर बावनकुळे यांच्या पत्नी ज्योती बावनकुळे, तसेच उज्ज्वला पवार, रूपाली खैरनार, विशाल घेगडे, माऊली कबाडी यांच्या हस्ते महाआरती झाली. सकाळी सात वाजता महाआरती, आठ वाजता नियमीत पोथीवाचन व दुपारी बारा वाजता माध्यान्ह आरती झाली, अशी माहिती देवस्थान ट्रस्टचे अध्यक्ष बाळासाहेब कवडे यांनी दिली.
दिवसभरात हजारो भाविकांनी दर्शनाचा लाभ घेतला. देवस्थान ट्रस्टच्या वतीने चोख व्यवस्था ठेवण्यात आली होती. सायंकाळी सात वाजता नियमित हरिपाठ व चंद्रोदयापर्यंत डॉ. किशोर महाराज डुंबरे यांचे हरिकीर्तन झाले. त्यांना राम प्रासादिक भजनी मंडळ, शिरोली यांनी साथसंगत दिली. प्रवीण जालिंदर वाळूंज यांच्याकडून अन्नदान होते. शुभम रत्नाकर डोके यांनी देवस्थान ट्रस्टला देणगी दिली.