शिरोली बुद्रुक येथे दुचाकीस्वाराचा मृत्यू

ओझर, ता. २४ ः शिरोली बुद्रुक (ता. जुन्नर) गावच्या हद्दीत स्कूलबस आणि दुचाकीची समोरासमोर धडकेत दुचाकीस्वाराचा मृत्यू झाला आहे. हा अपघात बुधवारी (ता. २४) सायंकाळी सव्वापाच वाजण्याच्या सुमारास जुन्नर कारखाना रस्त्यावर कुरण फाट्याजवळ घडला. या घटनेबाबत मिळालेल्या माहितीनुसार, शिरोलीहून विद्यार्थ्यांना घेऊन (क्र. एमएच १४ सीडब्ल्यू ०९५५) ही स्कूलबस कारखान्याच्या दिशेने जात असताना कारखान्याकडून जुन्नरच्या दिशेने जाणाऱ्या होंडा शाईन (क्र. एमएच १४ सीके ५४४८) या दुचाकीची समोरासमोर धडक झाली. या अपघातात दुचाकी चालक स्वामीनंद रोहिदास गाडेकर (रा. चावंड कुकडेश्वर फाटा, ता. जुन्नर) याचा मृत्यू झाला. या अपघाताबाबत सनिल भगवान गाडेकर यांच्या फिर्यादनुसार पोलिसांनी घटनास्थळी जाऊन पंचनामा केला. या घटनेचा तपास जुन्नरचे पोलिस निरीक्षक किरण अवचर यांच्या मार्गदर्शनाखाली सहाय्यक उपनिरीक्षक भरत मुठे करीत आहेत.