शिरोलीत नागरिकांची आरोग्य तपासणी

ओझर, ता. १६ : शिरोली बुद्रूक (ता. जुन्नर) येथे उमेद ग्रामसंघाच्या माध्यमातून महिला बचत गटाच्या सदस्यांच्या कुटुंबीयांची तसेच नागरिकांची आरोग्य तपासणी करण्यात आली. यावेळी महिलांना नवीन व्यवसाय उभारणीबाबत मार्गदर्शन करण्यात आले.
तसेच नव्याने सुरू केलेल्या लघु उद्योगांची पाहणी करण्यात आली. उद्योग व्यावसायासाठी प्रत्येक गटाला ५० पैसे व्याजदराने कर्जाचे वाटप केले. जुन्नर पंचायत समितीकडून उमेद ग्रामसंघाच्या कार्यालयासाठी ७५ हजारांचा निधी उपलब्ध करून देण्यात आला आहे. बचत गटाचा माध्यमांतून शेतकरी महिलांसाठी लघुउद्योगांची उभारणी करून एक गाव एक उत्पन्न या उपक्रमा अंतर्गत महिला सक्षमीकरण करण्यासाठी प्रयत्न करण्यात येत आहेत. यावेळी पंचायत समितीच्या समन्वयक विद्या बांबळे, जिजाऊ प्रभाग संघाच्या अध्यक्षा मनिषा भगत, आरोग्य विभागाच्या सत्यवती औटी, उमेदच्या अध्यक्ष भावना थोरवे, उपसरपंच ग्रामसखी वैशाली थोरवे आदी उपस्थित होत्या.