पाबळ- केंदूर रस्त्याचे काम रखडले

पाबळ, ता. १७ : पाबळ ते केंदूर या रस्त्याचे काम गेल्या सहा महिन्यांपासून रखडले असून, रस्त्याची दुरवस्था झाली आहे. पाबळ (ता. शिरूर) बाजूकडील सुरुवातीचा एक किलोमीटरचा भाग अक्षरशः खड्डेमय झाला आहे. जागोजागी पडलेल्या मोठ्या खड्ड्यांमुळे वाहनचालकांना जीव मुठीत धरून प्रवास करावा लागत आहे. रखडलेल्या कामामुळे नागरिकांमधून तीव्र संताप व्यक्त होत आहे.
या मार्गावरील काम अनेक ठिकाणी अर्धवट अवस्थेतच सोडण्यात आले आहे. एका बाजूला केवळ खडी- डांबर टाकण्यात आले असताना दुसऱ्या बाजूला खड्डे कायम आहेत. नव्याने केलेले डांबरीकरणही उखडून पुन्हा खड्डे पडत आहेत. त्यामुळे वारंवार अपघात होत असून, दुचाकीस्वार घसरून पडण्याच्या घटना घडत आहेत.
दररोज शेकडो वाहने या रस्त्यावरून ये- जा करतात. तरीही सार्वजनिक बांधकाम विभागाकडून दुर्लक्ष होत असल्याचा आरोप स्थानिक नागरिकांनी केला आहे. त्यामुळे रस्त्याचे काम तातडीने पूर्ण करून गुणवत्तेची चौकशी व्हावी, अशी मागणी स्थानिक नागरिक व वाहनचालकांकडून होत आहे. मंजूर निधीतील उर्वरित रक्कम न मिळाल्याने ठेकेदाराने काम थांबवले असल्याची माहिती बांधकाम विभागाकडून देण्यात आली आहे.

पाबळ -केंदूर रस्त्यावरील खड्डे बुजविण्यासाठी व रखडलेले काम मार्गी लावण्यासाठी ठेकेदाराला सूचना दिल्या आहेत. सुरुवातीच्या ८०० मीटर रस्त्याचे काम मंजूर नसल्याने आणि काही ठिकाणी शेतकऱ्यांचा विरोध असल्याने अडथळे निर्माण झाले आहेत. सकारात्मक प्रयत्न सुरू असून, लवकरच उर्वरित काम पूर्ण होईल.
- सूर्यकांत कुंभार, उपअभियंता, सार्वजनिक बांधकाम विभाग

पाबळ- केंदूर रस्त्यावर मोठ्या प्रमाणात खड्डे पडले असून, काम अपूर्ण आहे. विशेषतः रात्रीच्या वेळी खड्ड्यांचा अंदाज न आल्याने अपघातांचा धोका अधिक वाढत आहे. प्रशासनाने रस्त्याचे काम तातडीने मार्गी लावावे.
- सौरभ पडवळ, वाहनचालक

दृष्टीक्षेपात
पाबळ ते केंदूर रस्त्यावर पाबळ बाजूकडील एक किलोमीटर अंतरावर खड्डेच खड्डे.
त्यापुढील भागात डांबर मिश्रित खडी टाकून सहा महिन्यांहून अधिक काळ रखडलेले काम.
थिटेवाडी दरम्यान काही अंतरावर एका बाजूने खडी- डांबर टाकून दुसऱ्या बाजूचे काम अपूर्ण.
नव्याने केलेले डांबरीकरण उखडून खड्डे पडण्यास सुरुवात.
काही स्थानिक शेतकऱ्यांचा विरोध व अपूर्ण निधी यामुळे काम रखडले.

01336