शिरूररला गणांच्या आरक्षणासाठी सोमवारी सोडत

शिरूर, ता. १० : आगामी पंचायत समिती निवडणुकीच्या पार्श्वभूमीवर शिरूर तालुक्यातील पंचायत समिती निर्वाचक गणासाठी विविध प्रवर्गांकरिता आरक्षणाची सोडत सोमवारी (ता. १३) दुपारी १२ वाजता काढण्यात येणार आहे. ही सोडत शिरूर येथील नवीन प्रशासकीय इमारतीत तहसील कार्यालयातील सभागृहात पार पडणार असून, नागरिकांनी यावेळी उपस्थित राहावे, असे आवाहन तहसीलदार बाळासाहेब म्हस्के यांनी केले.
जिल्हा परिषदा व पंचायत समित्या अधिनियम, १९६१ मधील तरतुदी आणि महाराष्ट्र जिल्हा परिषदा व पंचायत समित्या (जागांच्या आरक्षणाची पद्धत व चक्रानुक्रम) नियम, २०२५ नुसार ही सोडत काढण्यात येणार आहे. याअंतर्गत पंचायत समिती निर्वाचक गणासाठी अनुसूचित जाती, अनुसूचित जमाती, नागरिकांचा मागास प्रवर्ग तसेच महिला (अनुसूचित जाती, अनुसूचित जमाती व नागरिकांचा मागास प्रवर्ग यांतील महिलांसह) या प्रवर्गांसाठी आरक्षण निश्चित करण्यात येणार आहे. तालुक्यातील गावागावांत स्थानिक स्वराज्य संस्थांच्या निवडणुकांबाबत कमालीची उत्सुकता असल्याने, या आरक्षण सोडतीकडे सर्वांचे लक्ष लागले आहे.