कवठे येमाई येथून पिकअपची चोरी

कवठे येमाई, ता. १८ : कवठे येमाई (ता. शिरूर) येथे घरासमोर मोकळ्या जागेत उभी केलेली पिकअप चोरट्यांनी चोरून नेल्याची घटना शुक्रवारी (ता. १६) रात्रीच्या सुमारास घडली. याप्रकरणी सोमनाथ नथू जाधव (वय २४, रा. कवठे येमाई) यांनी शिरूर पोलिस ठाण्यात फिर्याद दिली.
मिळालेल्या माहितीनुसार, सोमनाथ जाधव यांचा ट्रान्सपोर्टचा व्यवसाय असून, त्यांनी गुरुवारी रात्री त्यांची पिकअप (क्र. एम.एच. १४ एच जी ४४१५) घरासमोरील मोकळ्या जागेत उभी केली होती. शुक्रवारी सकाळी पाहिले असता पिकअप जागेवर दिसून न आल्याने चोरी झाल्याचे लक्षात आले. परिसरात शोधाशोध करूनही वाहनाचा थांगपत्ता लागला नाही. यानंतर जाधव यांनी शिरूर पोलिस ठाण्यात चोरीची फिर्याद दाखल केली. पोलिसांनी चोरट्यांविरुद्ध गुन्हा दाखल केला. पुढील तपास पोलिस हवालदार शरद वारे करीत आहेत.