कोरेगाव परिसरातील बंधाऱ्यांना धोका

पाईट, ता. २६ : कोरेगाव परिसरात (ता. खेड) मॉन्सूनपूर्व पाऊस आणि त्याचा वाढलेला जोर यामुळे पश्चिम भागातील नद्या, बंधारे, ओढ्यांच्या पाणी पातळीत मोठी वाढ होत आहे. त्यामुळे भामानदीवर असलेले कोल्हापूर पद्धतीचे बंधारे भरून ओसंडून वाहत आहेत. अचानक होत असलेल्या पावसाचा जोर वाढत असून बंधाऱ्यांना लावलेल्या गेटवर व बंधाऱ्याच्या भिंतीवर दबाव येत आहे.
भामा नदीवरील कोरेगाव खुर्द आणि कोरेगाव बुद्रुक दरम्यान असलेल्या बंधाऱ्याची एक भिंत परवा यामुळेच पडली असल्याचे माजी जिल्हा परिषद सदस्य तथा भाजपाचे उत्तर पुणे जिल्हाध्यक्ष शरद बुट्टे पाटील व ग्रामस्थ यांनी सांगितले.
एरव्ही धरणाचे पाणी नदीपात्रात सोडताना किती वेगाने आणि क्षमतेने सोडायचे हे जलसंपदा विभाग ठरवत असतो. मात्र, सद्या मॉन्सून पूर्व पाऊस कमी वेळात अधिक पडत असल्याने अनेक ठिकाणचे बंधाऱ्याच्या ठिकाणी पाणी पातळीत वाढ होऊन बंधाऱ्याच्या भिंतीवर दबाव वाढताना दिसत आहे. त्यामुळे अनेक गावातील ग्रामस्थ चिंताग्रस्त आहेत. काही ठिकाणी बंधाऱ्यावरून पाणी गेल्यास वाहतूकीस अडथळा निर्माण होऊन मोठी दुर्घटना घडण्याची शक्यता ग्रामस्थ व्यक्त करीत आहेत.
पावसाने पश्चिम भागातील थोपटवाडी आसखेड, शेलू, कोरेगाव बुद्रुक, चांदुस, पिंपरी बुद्रुक, रोहकल, चाकण, काळूस, संगमवाडी या भागात कोल्हापूर पद्धतीचे बंधाऱ्यसह छोटे बंधारेही पूर्ण क्षमतेने भरत आले आहेत, त्यामुळे बंधारे,ओढे यांचे अतिरिक्त पाणी नदीपात्रात येऊन नदीच्या पाणीपातळीत वाढ होत आहे. तसेच वाढलेले पाणी पुढे वाहून जाण्यासाठी बंधाऱ्याचा अडथळा असल्याने हे पाणी बाजूचे भागात घुसल्यास मोठे नुकसान होऊ शकते.
दरम्यान, प्रशासनाने या गोष्टी गांभीर्याने घेऊन नुकसान झाल्यावर उपाय करण्यापेक्षा नुकसान होऊ नये म्हणून काम केले पाहिजे. अशी मागणी बुट्टे पाटील यांनी केली आहे.

02368