राजगुरुनगर रोटरीतर्फे शैक्षणिक ॲपचे वितरण

पाईट, ता. २७ : पिंपरी बुद्रुकच्या श्री सुमंत माध्यमिक विद्यालयातील ५४ विद्यार्थ्यांना व सहा शिक्षकांना रोटरी क्लब ऑफ राजगुरुनगर यांच्या वतीने शैक्षणिक स्टडी ॲपचे वितरण करण्यात आले. हा उपक्रम रोटरीचे अध्यक्ष राजन जांभळे यांच्या हस्ते व सुमंत संस्थेचे अध्यक्ष बाबाजी ठाकूर व सचिव कैलास ठाकूर यांच्या प्रमुख उपस्थित पार पडला.
याप्रसंगी अध्यक्ष जांभळे म्हणाले की, ग्रामीण भागातील विद्यार्थ्यांच्या अभ्यासाला डिजिटल स्टडी ॲपच्या माध्यमातून चालना देण्याच्या उद्देशाने राबविण्यात आलेला उपक्रम उल्लेखनीय ठरत आहे. श्री सुमंत विद्यालयातील ई-लर्निंग लॅबमधे या ॲपचा वापर करून ग्रामीण भागातील विद्यार्थ्यांना शहरी भागातील शाळांप्रमाणेच सर्व सुविधा पुरविण्याचा संस्था नेहमीच प्रयत्न करते. गेल्या वर्षी झालेल्या बोर्डाच्या परीक्षेत राजगुरुनगर येथील विद्यार्थिनी कनुप्रिया सांडभोर हिने याच सुविधांचा वापर करून दहावीच्या परीक्षेत १०० टक्के गुण मिळवून यश संपादन केले. त्यामुळे याचा तालुक्यातील विद्यार्थ्यांना निश्‍चितच फायदा होईल. विद्यार्थ्यांना विविध विषयांमध्ये सखोल मार्गदर्शन मिळावे, स्वयं-अध्ययन व सराव परीक्षांची तयारी करता यावी आणि एकूणच गुणवत्तेत वाढ व्हावी या उद्देशाने हे ॲप विकसित केले आहे.
याप्रसंगी मुख्याध्यापक शरद सोमवंशी यांच्यासह शिक्षक व शिक्षकेतर कर्मचारी उपस्थित होते.