जखमींच्या आर्थिक मदतीसाठी सरसावले ग्रामस्थ

पाईट, ता. १३ : खेड तालुक्याच्या पश्चिम पट्ट्यासाठी पाईट येथे ग्रामीण रुग्णालय व्हावे, अशी मागणी पाईट येथील शोकसभेत पंचक्रोशीतील ग्रामस्थांनी एकमुखाने केली. पुढील १० दिवस गावासाठी सामुदायिक दुखवटा जाहीर केला आहे. तसेच, कुंडेश्वर येथील अपघातात जखमी रुग्णांच्या कुटुंबीयांना सावरण्यासाठी पाईट व पंचक्रोशीतील ग्रामस्थ आर्थिक मदतीसाठी पुढे सरसावले आहेत. पाईट गावामध्ये येत्या १० दिवसांत कोणताही सांस्कृतिक, सामाजिक कार्यक्रम घेण्यात येणार नसल्याचेही जाहीर करण्यात आले.
कुंडेश्वर येथील अपघातात मृत्युमुखी पडलेल्या पापळवाडी येथील १० महिलांना श्रद्धांजली वाहण्यासाठी पाईट येथील ग्रामपंचायत कार्यालयाच्या प्रांगणात शोकसभा व ‘पाईट बंद’चे आवाहन ग्रामस्थांनी केले होते.त्यास अनुसरून कडकडीत बंद पाळण्यात आला. शोकसभेत पश्चिम भागातील देवतोरणे, अहिरे, रौंधळवाडी, कासारी, पाळू, तळवडे, हेद्रुज व पाईट गावठाणासह १२ वाड्यावस्तींवरील ग्रामस्थ, तसेच पाईटमधील सर्व व्यापारी, ग्रामस्थ, तरुण मंडळाचे कार्यकर्ते, महिला मोठ्या संख्येने उपस्थित होते.
शोकसभेत सखाराम खेंगले, उद्योजक हिरामण रौंधळ, युवक अध्यक्ष जयसिंग दरेकर, व्यापारी असोसिएशनचे अध्यक्ष जितेंद्र मेहेंदळे, देविदास बांदल, संजय रौंधळ, शिवकाली खेंगले, श्‍याम रौंधळ, अनिल डांगले, अश्विनी रौंधळ, शंकर खेंगले, विठ्ठल करंडे, अमित भोकसे, रोहित डावरे, ॲड. माया डांगले यांनी मनोगते व्यक्त केली. त्यात गावातील ग्रामस्थांनी दाखवलेली एकजूट, सर्वतोपरी केलेल्या मदतकार्याचे उपस्थितांनी कौतुक केले. उपमुख्यमंत्री अजित पवार यांचे विशेष कार्य अधिकारी दिगंबर रौंधळ, मेडिकल सेलचे अधिकारी मधुसूदन मगर, तसेच सर्व अधिकारी, तसेच सर्व पोलिस यंत्रणा यांचेही आभार मानले. महादू डांगले यांनी सूत्रसंचालन केले.
दरम्यान, खेड, चाकण, भोसरी, पुणे येथील रुग्णालयामध्ये उपचार घेत असलेल्या सर्व जखमी रुग्णांना व त्यांच्या नातेवाइकांना कासारीचे देविदास बांदल यांच्याकडून रोज दोन्ही वेळच्या जेवणाची सोय केली आहे.