पत्नीच्या खूनप्रकरणी पतीस आजन्म सश्रम कारावास

पाईट, ता. १३ : नाणेकरवाडी (चाकण) सन २०१७ मध्ये पत्नीचा कोयत्याने निर्घृण खून केल्यानंतर पुरावा नष्ट करण्याच्या उद्देशाने मूळगावी जाऊन विष पिऊन आत्महत्या करण्याचा प्रयत्न करणारा आरोपी पती प्रल्हाद नरहरी रूपनर (वय ३५ रा. ममदापुरा ता. अंबाजोगाई जि. बीड) यास खेड (राजगुरुनगर) जिल्हा व अतिरिक्त सत्र न्यायालयाचे न्यायाधीश एस. पी. पोळ यांनी आजन्म सश्रम कारावासाची शिक्षा सुनावली आहे.
आरोपी प्रल्हाद नरहरी रूपनर (वय ३५ रा ममदापुरा ता.अंबाजोगाई, जि. बीड) हा पत्नी व दोन मुलांसह चाकणच्या नाणेकरवाडी येथे भाड्याने खोली घेऊन राहत होता. त्याची पत्नी यशोदा प्रल्हाद रुपनर (वय २५ ) हिच्याशी दि. १८ नोव्हेंबर २०१७ रोजी सायंकाळी ६.३० वाजण्याच्या सुमारास गावाकडील जमिनीच्या वादातून त्याचे भांडण झाले. त्यावेळी प्रल्हाद रूपनर याने पत्नीच्या तोंडात कापडाचा बोळा कोंबून, तिच्या डोक्यात तोंडावर कोयत्याने वार करून तिचा निर्घृण खून केला. खून केल्यानंतर त्याने भाड्याने राहत असलेल्या खोलीत प्रेत लपवून ठेवून कोणाला संशय येऊ नये म्हणून खोलीला बाहेरून कडी लावली. पुरावा नष्ट करण्याच्या उद्देशाने तो त्याच्या मूळ गावी ममदापुरा येथे निघून गेला. तिथे गेल्यानंतर त्याने विष पिऊन आत्महत्या करण्याचा प्रयत्न केला होता. दरम्यान, मयताचे नातेवाईक अमित सुमंतराव गडदे (मूळगाव चिंचखंडी ता. अंबाजोगाई जि. बीड) यांनी याबाबत फिर्याद दिली होती. चाकण पोलिसांनी अंबाजोगाई येथे जाऊन प्रल्हाद रूपनर यास अटक केली होती. या गुन्ह्याचा तपास तत्कालीन सहाय्यक पोलिस निरीक्षक प्रशांत पवार यांनी केला होता. हा खून खटला न्यायाधीश एस. पी. पोळ यांच्या पुढे सुरू होता. या खटल्यात सहाय्यक सरकारी अभियोक्ता विकास देशपांडे, वसंत वाळेकर यांनी सरकारी पक्षाची बाजू मांडत १३ साक्षीदार तपासत शिक्षा सुनावली. यात कोर्ट पैरवी म्हणून महिला पोलिस कॉन्स्टेबल पूजा काळे यांनी काम पाहिले.