तोरणे बुद्रूकच्या सरपंचपदी देवाडे

पाईट, ता. १६ : तोरणे बुद्रुक (ता. खेड) ग्रामपंचायतीच्या सरपंचपदी विजया देवाडे यांची बिनविरोध निवड करण्यात आली आहे. यापूर्वीच्या सरपंच आरती शिंदे यांनी राजीनामा दिल्याने हे पद रिक्त झाले होते.
सरपंचपदाच्या निवडीसाठी ग्रामपंचायत कार्यालय येथे अध्यासी अधिकारी तथा पाईट मंडल अधिकारी मनीषा सुतार यांचे अध्यक्षतेखाली सभेचे आयोजन केले होते. सरपंचपदासाठी देवाडे यांचा एकमेव अर्ज आला होता. त्यामुळे देवाडे यांची सरपंचपदी बिनविरोध निवड झाल्याचे सुतार यांनी जाहीर केले. या निवडणूक प्रक्रियेत ग्रामसेवक दीपक तळपे आदींनी साहाय्य केले. या वेळी ग्रामपंचायतीचे सदस्य किसन आवारी, सुनीता कलवडे, गौतम आवारी आदी उपस्थित होते.