आहुपे परिसरात हिरडा फळास फटका

फुलवडे, ता.१४ : आहुपे, पाटण व भीमाशंकर खोऱ्यात (ता. आंबेगाव) मागील तीन दिवसांपासून जोरदार पाऊस पडत आहे. त्यामुळे हिरडा फळास फटका बसला आहे. पावसामुळे हिरडा झाडावरून काढणे, सुकविणे ही कामे पूर्णपणे थांबली आहेत. पाऊस उघडत नसल्यामुळे झाडावरील हिरड्याचे बीज मोठे झाले आहे. त्यामुळे शेतकऱ्यांचे नुकसान होत आहे.

वादळी वाऱ्यासह अवकाळी पावसामुळे लहान, मोठा हिरडा जमिनीवर पडून त्याचे नुकसान झाले आहे. शेतकऱ्यांनी गोळा केलेला हिरडा पावसामुळे वाळविता येत नसल्याने हिरड्याची गुणवत्ता खराब होत चालली आहे.
हिरडा हे असे फळ आहे की, जे विशिष्ट आकाराचे झाल्यानंतर दोन तीन दिवसात झाडावरून काढले नाही तर हिरड्यातील बीज मोठे होते. त्यामुळे त्या हिरड्याची किंमत सात ते आठ पटीने कमी होते. जर तो हिरडा काढला तर तो तसाच विकावा लागतो. सध्या प्रतिकिलोस २५-३० रुपये मिळतात. त्यामुळे शेतकऱ्यांचे आर्थिक नुकसान होत आहे.
आदिवासी भागात ९५ टक्के हिरडा हा मालकी जमिनीतील आहे. शाश्वत संस्थेने हिरड्याची झाडे ७/१२ वर नोंद होण्यासाठी शासनाकडे तीनवेळा पत्रव्यवहार केला आहे.
एकात्मिक ग्राम विकास प्रकल्प अंतर्गत जिल्हाधिकारी, मुख्य कार्यकारी अधिकारी, पुणे यांच्यासमोर याविषयी मांडणी करून लेखी पत्रव्यवहार, टाटा मोटर्स व शाश्वत संस्थेमार्फत केलेला आहे. शेतकऱ्यांच्या ७/१२ ला हिरडा झाडांची नोंद झाल्याशिवाय शासन नुकसानीबाबत पंचनामे करणार नाही. शेतकऱ्यांना नुकसानभरपाई मिळणार नाही. त्यामुळे तहसीलदार यांनी शिबिर आयोजित करून हिरडा व अन्य झाडांची ७/१२ ला नोंद करावी, अशी मागणी शाश्वत संस्थेचे अध्यक्ष बुधाजी डामसे व ग्रामस्थांनी केली आहे.
03976