माळीण येथे महामानवांची संयुक्त जयंती

फुलवडे, ता. १९ : माळीण (ता. आंबेगाव) येथे पँथर मनोहर अंकुश प्रतिष्ठान आणि समता मित्र मंडळाने शनिवारी (ता. १७) महामानव स्वराज्य संस्थापक छत्रपती शिवाजी महाराज, विश्‍वरत्न डॉ. बाबासाहेब आंबेडकर, आद्य क्रांतिकारक बिरसा मुंडा यांच्या संयुक्त जयंती महोत्सवाचे आयोजन केले होते. यावेळी प्रा. प्रकाश अंकुश यांच्या प्रकाशयात्री या ग्रंथाचे प्रकाशन मान्यवरांच्या हस्ते पार पडले.
याप्रसंगी पुणे जिल्हा परिषदेचे माजी उपाध्यक्ष विवेक वळसे पाटील, अभिनेत्री रूपाली वाकोडे, सामाजिक न्याय विभागाचे बार्टी येथील उपायुक्त उमेश सोनवणे, प्रकाश घोलप, नंदकुमार सोनवले, अक्षय काळे, विजय आढारी, किसन गभाले, सखाराम गभाले, जगन्नाथ अंकुश, सावळेराम लेंभे, प्रा. प्रकाश अंकुश, सरपंच संगीता किर्वे, रघुनाथ झांजरे उपस्थित होते.
सकाळी नरेश कसबे यांनी त्रिशरण आणि पंचशिला करून झेंडा वंदन केले. त्यानंतर बुद्ध आणि त्यांच्या धम्म ग्रंथाचे वाचन झाले. तर प्रमुख वक्ते शाहीर ढवळा ढेंगळे, निसर्ग कवी मोहन नंदकर यांनी कवितेतून प्रबोधन केले. सायंकाळी मिरवणूक काढण्यात आली.
यावेळी विवेक वळसे पाटील यांनी जयंती महोत्सव कार्यक्रमाचे कौतुक करत जनतेला आवाहन केली की, ‘सर्व समाजांनी एकत्र येऊन महापुरुषांची जयंती साजरी करावी यासाठी आमदार वळसे पाटील यांच्या माध्यमातून मदत केली जाईल असे सांगितले.
यावेळी पँथर नेते मनोहर अंकुश प्रतिष्ठानच्या वतीने चंद्रकांत बांबळे (सामाजिक), मछिंद्रनाथ झांजरे (शैक्षणिक), किरण शिंगाडे (कला), उत्तम वाघमारे, प्रकाश अंकुश (सामाजिक व शैक्षणिक), तुकाराम भांगले (पत्रकार), सौरव अंकुश (क्रीडा) यांना आंबेगाव भूषण पुरस्काराने सन्मानित करण्यात आले. यावेळी विशेष प्रावीण्य प्राप्त मान्यवर अॅड. दिलीप अंकुश, अॅड. माधुरी अंकुश, अॅड. दिक्षा अडसूळ यांचा सत्कार करण्यात आला.
कार्यक्रमाचे नियोजन समता मित्र मंडळ माळीण, आमडे, कोंढरे ग्रामस्थ तसेच मुंबईकर, पुणेकर यांनी केले होते. प्रस्ताविक अमोल अंकुश, सूत्रसंचालन सतीश अंकुश यांनी तर आभार प्रकाश अंकुश यांनी मानले.