आहुपेत काढून ठेवलेला हिरडा कुजला

फुलवडे ता. २६, आंबेगाव तालुक्याच्या पश्चिम आदिवासी भागातील भीमाशंकर, पाटण व आहुपे खोऱ्यातील गावांमध्ये रविवारी (ता.२५) सर्वाधिक १२९ मिलिमीटर पावसाची नोंद झाली आहे. सतत पडणाऱ्या पावसामुळे काढून ठेवलेला हिरडा कुजला आहे.
भीमाशंकर, आहुपे ते पाटण खोऱ्यातील आदिवासी भागांमध्ये सध्या हिरड्याच्या झाडांना हिरडा आलेला आहे. आठवडाभर होत असलेल्या अवकाळी पाऊस वादळी वाऱ्याने हिरड्याची झाडे झोडून काढली. सर्वत्र पावसाने कहर करत मोठ्या प्रमाणात हिरडा पिकाचे नुकसान होऊन हिरडा वाया गेला आहे. तर काही भागात त्याला बुरा लागून तो खराब झाला आहे. त्यामुळे आदिवासी शेतकऱ्यांचे आर्थिक नुकसान झाले आहे.
हाता तोंडाशी आलेलं बाळ हिरड्याचे उत्पन्न शेतकऱ्यांच्या हातातून गेल्याने आदिवासी भागातील शेतकरी चिंताग्रस्त झाला आहे. परंतु प्रशासनाचे आमच्या नुकसानीकडे अजिबात लक्ष नाही असे या परिसरातील नुकसानग्रस्त शेतकरी सांगत आहेत.
भात शेतीच्या रोपांसाठी शेतकऱ्यांनी साठवणूक केलेला राब गवत, पेंढा, गौरी आदी भिजून गेल्याने भात रोपे करणे अवघड झाले आहे. पावसाळा सुरू होण्याअगोदर साठवणूक केलेली चुलीची लाकडे (फाटी) सरपण, जनावरांसाठी साठवून ठेवलेला चारा भिजून गेला. त्यामुळे पुढील काळामध्ये चाऱ्याची मोठी टंचाई निर्माण होणार आहे.
शासनाने पावसाने नुकसान झालेल्या पिकांचे पंचनामे करून नुकसान भरपाई द्यावी अशी मागणी या भागातील नुकसानग्रस्त शेतकऱ्यांनी केली आहे.

04008