‘पेसा’ची पायमल्ली केल्यास रस्त्यावर उतरणार

भीमाशंकर ता. ३ : ‘‘केंद्र सरकारच्या धोरणान्वये धार्मिक स्थळे जोडण्याचा मुख्य उद्देश समोर ठेवून बनकर फाटा- जुन्नर- घोडेगाव- तळेघर- भीमाशंकर, असा राष्ट्रीय महामार्ग क्रमांक ६१ हा आंबेगाव तालुक्यातील अनुसूचित क्षेत्रातील सोळा गावांमधून जाणार आहे. हा महामार्ग होत असताना पेसा कायद्याची पायमल्ली करून काही निर्णय होत असतील तर आदिवासी जनता ही रस्त्यावर उतरल्याशिवाय राहणार नाही,’’ असा इशारा आदिवासी समाज कृती समितीचे संस्थापक-संचालक सीताराम जोशी यांनी दिला.
या महामार्गासंदर्भात बाधित शेतकरी, ग्रामस्थ, सामाजिक कार्यकर्ते यांच्याशी समन्वय साधण्यासाठी जुन्नर-आंबेगावचे उपविभागीय अधिकारी गोविंद शिंदे यांच्या अध्यक्षतेखाली तळेघर (ता. आंबेगाव) येथील सभागृहात बैठक झाली. त्यावेळी जोशी यांनी इशारा दिला. या वेळी आंबेगावचे तहसीलदार संजय नागटिळक, राष्ट्रीय महामार्गाच्या अधिकारी प्रेरणा कोटकर, सलीम शेख, तालुका कृषी अधिकारी संदेश ढवळे, विस्तार अधिकारी सागर कांबळे, रवींद्र तळपे, सामाजिक कार्यकर्ते नीलेश साबळे, अॅड. किरण गभाले, शंकर मोहंडुळे, अशोक पेकारी, भीमाशंकर कारखान्याचे माजी अध्यक्ष देवदत्त निकम, दीपक चिमटे, के. के. तिटकारे, हनुमान इष्टे व परिसरातील आदिवासी बांधव उपस्थित होते.
यावेळी उपविभागीय अधिकारी गोविंद शिंदे म्हणाले, ‘‘प्रत्येक गावाने ग्रामसभा लावाव्यात. या ग्रामसभेत शासनाचा प्रतिनिधी पाठवून हा प्रकल्प समजावून दिला जाईल.’’