शाळेच्या पहिल्याच दिवशी मिळणार गणवेश

फुलवडे, ता. ५ : समग्र शिक्षा अभियानांतर्गत मोफत गणवेश योजनेसाठी युडायस प्लस समग्र शिक्षा, पीएमश्री व राज्य गणवेश योजनेसाठी एकूण ४२ लाख ९७ हजार ७९० पात्र लाभार्थ्यांकरिता प्रतिलाभार्थी दोन गणवेश संचासाठी ६०० रुपयांप्रमाणे १८१ कोटी ४७ लाख ९७ हजार २०० रुपयांचा निधी भारत सरकारकडून मंजूर केला आहे.
शाळेच्या पहिल्याच दिवशी स्थानिक स्वराज्य संस्था व शासकीय शाळेत शिक्षण घेणाऱ्या पहिली ते आठवीपर्यंतच्या विद्यार्थ्यांना दोन गणवेश मोफत देण्यात येतात. मात्र, स्काउट गाईडच्या दुसऱ्या गणवेशासाठी विद्यार्थ्यांना प्रतीक्षा करावी लागणार आहे.
शासकीय व स्थानिक स्वराज्य संस्थेतील शाळांमधील पहिली ते आठवीमध्ये शिक्षण घेत असलेल्या मुली, अनुसूचित जाती व अनुसूचित जमातीची मुले तसेच दारिद्र्यरेषेखालील पालकांच्या मुलांना ही योजना लागू आहे. राज्य शासनाच्या मोफत गणवेश योजनेंतर्गत दारिद्र्यरेषेखालील पालकांच्या एकूण ११ लाख १५ हजार ७६० विद्यार्थ्यांकरिता प्रतिगणवेश ३०० रुपयांप्रमाणे दोन गणवेशासाठी ६०० रुपये प्रतिविद्यार्थी याप्रमाणे ६६ कोटी ९४ लाख ५६ हजार रुपयांची आर्थिक तरतूद मंजूर करण्यात आली आहे.

राज्य स्तरावरून सद्यःस्थितीत ५० टक्के निधी प्राप्त झाला आहे. मात्र शाळेच्या पहिल्याच दिवशी सर्व विद्यार्थ्यांना शाळा व्यवस्थापन समितीने दोन गणवेश संच उपलब्ध करून द्यावेत, तसेच विलंब करण्यात येऊ नये, असे शासन आदेशात म्हटले आहे. मात्र दुसऱ्या गणवेशासाठीसुद्धा शासनाने तत्काळ निधी उपलब्ध करून द्यावा.
- रोहित हिले, अध्यक्ष, शाळा व्यवस्थापन समिती, फुलवडे, ता. आंबेगाव

प्रतिविद्यार्थी एका गणवेशासाठी ३०० रुपये व एक बूट व पायमोजे खरेदीसाठी १७० रुपये अनुदान देण्यात येते. मात्र, एवढ्या कमी दरात खरेदी करताना चांगलीच कसरत करावी लागते. या अनुदानात पुढील वर्षापासून वाढ होण्याची आवश्यकता आहे. याबाबत शासन स्तरावर पाठपुरावा करणार आहे.
- दत्तात्रेय वाळुंज, माजी अध्यक्ष, पुणे जिल्हा शिक्षक संघ