विद्यार्थ्यांच्या उपस्थितीसाठी शिक्षण विभागाचा उपक्रम

फुलवडे, ता. १२ : शैक्षणिक वर्ष २०२५-२६ मध्ये विदर्भ वगळता इतर सर्व विभागांतील राज्य मंडळाच्या शाळा १६ जूनपासून सुरू होत आहेत, तर विदर्भातील शाळा २३ जूनपासून सुरू होणार आहेत.
नवीन शैक्षणिक वर्षात शाळेत मुलांची उपस्थिती व शाळेची गुणवत्ता वृद्धिंगत करण्यासाठी शासनाने १२ मार्चच्या शालेय शिक्षण विभागाच्या शासन निर्णयाद्वारे १०० टक्के शाळांना भेटी देणे हा उपक्रम राबविण्याचे निर्देश दिले आहेत. पहिल्या व दुसऱ्या दिवशी मुख्यमंत्री, उपमुख्यमंत्री, सर्व मंत्री, राज्यमंत्री, खासदार, आमदार, लोकप्रतिनिधी, सर्व सनदी अधिकारी हे आपापल्या मतदारसंघांत किंवा नजीकच्या किमान एकेका शाळेमध्ये नवागत विद्यार्थ्यांचे स्वागत करण्यासाठी उपस्थित राहणार आहेत. त्यांच्यासमवेत संपर्क अधिकारी नियुक्त करण्याच्या सूचना दिल्या आहेत. या सर्व भेटीचे नियोजन मनपा आयुक्त, जिल्हाधिकारी, मुख्य कार्यकारी अधिकारी करणार आहेत. या अधिकाऱ्यांना वर्षभरासाठी एक शाळा दत्तक देण्यात येणार आहे. या शाळांना वर्षभर वेळोवेळी भेटी देऊन विद्यार्थी गुणवत्ता व शाळांच्या भौतिक सुविधा यांचा आढावा घेणार आहेत.

शाळा दत्तक घेण्याच्या सूचना
शिक्षण विभागातील अधिकारी, प्राचार्य डाएट, प्राथमिक, माध्यमिक शिक्षणाधिकारी, ज्येष्ठ अधिव्याख्याता, गटशिक्षणाधिकारी, अधिव्याख्याता, अधीक्षक, विस्तार अधिकारी शिक्षण यांनी नमूद शाळांव्यतिरिक्त अजून प्रत्येकी दोन शाळा दत्तक घेण्याच्या सूचना देण्यात आल्या आहेत.

शिक्षण विभागाच्या सूचना
- शाळा सुरू होण्यापूर्वी शालेय परिसर स्वच्छ ठेवावा.
- शालेय विद्यार्थ्यांची प्रभात फेरी काढावी.
- विद्यार्थ्यांचे गुलाबपुष्प देऊन स्वागत करावे.
- मोफत गणवेश, पाठ्यपुस्तके वाटप करावीत.
- शैक्षणिक गुणवत्ता उपक्रम नियोजन आढावा घेणे.
- भौतिक सुविधांचा आढावा घेणे.
- पहिला दिवस उत्सवाप्रमाणे साजरा करून तिथी भोजन आयोजित करावे.

सोळा जूनपासून नवीन शैक्षणिक वर्षाची सुरुवात होत आहे. शाळेच्या पहिल्याच दिवशी १०० टक्के विद्यार्थ्यांना पाठ्यपुस्तके व गणवेश वाटप करण्यात येणार आहे. विद्यार्थ्यांचे स्वागत करण्यासाठी शाळा व्यवस्थापन समिती, पालक, माजी विद्यार्थी, लोकप्रतिनिधी यांना निमंत्रण देण्यात येणार आहे. तसेच, या विद्यार्थ्यांचे स्वागत रांगोळी काढून, पुष्पगुच्छ/वृक्ष भेट देऊन व शुभेच्छा फलक लिहून करण्यात येणार आहे.
- दत्तात्रेय वाळुंज, माजी सदस्य, शिक्षण समिती, जिल्हा परिषद पुणे