डिंभे धरणामधून पाण्याचा विसर्ग बंद

फुलवडे, ता. २ : डिंभे (ता. आंबेगाव) येथील हुतात्मा बाबू गेनू जलाशयातून शनिवारी (ता. २) सकाळी ११ वाजता सांडव्यातून पाण्याचा विसर्ग बंद केला आहे. मात्र, वीज घरासाठी ६०० क्युसेकने पाण्याचा विसर्ग सुरू आहे. पावसाचा जोर कमी झाल्याने धरणप्रशासनाने हा निर्णय घेण्यात आला, अशी माहिती कुकडी पाटबंधारे विभागाने दिली.
धरणाचा आज सकाळी सहा वाजता पाणीसाठा ८७.२६ टक्के (१०.९०३ टीएमसी) इतका होता. जूनपासून आजअखेर ७१० मिलिमीटर पावसाची नोंद झाली आहे. दरम्यान, शुक्रवारपासून पावसाने उघडीप घेतली असली तरी अधूनमधून पावसाच्या तुरळक सरी कोसळत आहेत.
पावसाचा जोर वाढल्यास पाण्याचा विसर्ग पुन्हा सुरू होण्याची शक्यता वर्तवण्यात येत असून, नदीकाठच्या लोकांनी सतर्क राहावे व ग्रामपंचायतींनी देखील याची काळजी घ्यावी, असे आवाहन कुकडी पाटबंधारे विभागाने केले आहे.

04258