‘हर हर महादेव’च्या जयघोषाने दुमदुमले भीमाशंकर

भीमाशंकर, ता. १८ : बारा ज्योतिर्लिंगांपैकी सहावे ज्योतिर्लिंग श्री क्षेत्र भीमाशंकर येथे चौथ्या आणि शेवटच्या श्रावणी सोमवारी भाविकांनी ‘हर हर महादेव’च्या जयघोषात दर्शन घेतले.
पहाटेपासून भाविकांनी दर्शनासाठी लांबच लांब रांगा लावल्या होत्या. पहाटे ५ वाजता देवस्थान ट्रस्टच्या वतीने शिवलिंगावर दुग्धाभिषेक, महाआरती आणि शंखनाद करण्यात आला. त्यानंतर मंदिर भाविकांना दर्शनासाठी खुले करण्यात आले. श्रावणी सोमवार निमित्त मंदिराचा गाभारा आणि सभामंडप विविधरंगी फुलमाळांनी सजविण्यात आला होता. शिवलिंगावर विविध फुलांची सजावट करण्यात आली होती. मंदिर परिसरात विद्युत रोषणाई करण्यात आली होती. मंदिर परिसरात बेल, फुले, प्रसाद, खेळणी आदींची दुकाने थाटली होती.
क्रमांक १ ते ५ अशी वाहनतळ व्यवस्था होती. पार्किंग ते बसस्थानकापर्यंत मिनी बसची व्यवस्था करण्यात आली होती. देवस्थान ट्रस्टच्या वतीने भाविकांना दर्शन सुखकर होण्यासाठी दर्शन रांग, मुखदर्शन व ऑनलाइन दर्शन व्यवस्था केली होती. भाविकांसाठी आरोग्य विभागाची दोन पथके कार्यरत होती. यात्रा निर्विघ्न पार पाडण्यासाठी पोलिस प्रशासनाबरोबरच इतर सर्व विभागांनी चोख व्यवस्था केली होती.