डिंभे धरणातून होणारा पाण्याचा विसर्ग बंद

फुलवडे, ता. ९ : डिंभे (ता. आंबेगाव) येथील हुतात्मा बाबू गेनू जलाशयातून सुरू असलेला पाण्याचा विसर्ग पावसाने उघडीप दिल्याने बंद करण्यात आला असल्याची माहिती कुकडी पाटबंधारे विभाग, मंचर यांच्याकडून देण्यात आली आहे.
धरणात मंगळवारी (ता. ९ सप्टेंबर)सकाळी सहा वाजता पाणीसाठा ९८.१४ टक्के म्हणजेच १२.२६२ टीएमसी इतका झाला आहे. धरणातून सकाळी सात वाजता सांडव्यावरून घोड नदीपात्रात १९०० क्यूसेकने सुरू असलेला विसर्ग बंद करण्यात आला केला आहे. मात्र, वीज घरामार्फत घोड नदीपात्रात ४५० क्यूसेक व डिंभे उजवा कालवा १०० क्यूसेक असा एकूण ५५० क्यूसेकने विसर्ग सुरू आहे. धरण पाणलोट क्षेत्रात आजअखेर ९५३ मिलिमीटर पावसाची नोंद झाली आहे.