इंदिरानगर येथील वस्तीवर प्रौढ साक्षरता वर्ग सुरू

फुलवडे, ता. २ : ‘‘शिनोली (ता. आंबेगाव) येथील इंदिरानगर येथे आदिवासी कातकरी वस्तीवर आदिम संस्कृती अभ्यास, संशोधन व मानव विकास केंद्र, आंबेगाव व रोटरी क्लब ऑफ पूना नॉर्थ यांच्या सहकार्याने प्रौढ साक्षरता वर्ग सुरू करण्यात आले,’’ अशी माहिती आदिम संस्थेचे समीर गारे यांनी दिली.
शिक्षणापासून वंचित राहिलेल्या प्रौढांना ज्ञानाच्या प्रवाहात आणण्यासाठी येथील नागरिकांच्या मागणीनुसार प्रौढ साक्षरता वर्ग सुरु केला आहे. सध्या या वर्गात २० प्रौढ महिला दाखल झाल्या असून, त्यांना अक्षर ओळख, मूलभूत अंकज्ञान आणि व्यवहारज्ञान शिकवले जाणार आहे. यासोबतच विविध कायद्यांविषयी, योजनांविषयी देखील माहिती दिली जाणार आहे. हा वर्ग दररोज संध्याकाळी चालणार आहे.
यावेळी आदिम संस्थेच्या प्रा. स्नेहल साबळे म्हणाल्या की, माणूस हा आयुष्यभर विद्यार्थी असतो, शिक्षणाला वयाचे बंधन नसते. आपण घेतलेला हा निर्णय आपल्या पुढील पिढीसाठी खूप महत्त्वाचा आहे.
वस्तीतील अनेकांसाठी ज्ञानाचे एक नवीन दालन उघडणार असून, या आदिवासी कातकरी समुदायाच्या विकासाला गती देईल, असा विश्वास याप्रसंगी व्यक्त करण्यात आला. स्वयंसेविका अर्चना चौरे यांनी सूत्रसंचालन केले.