कुल व थोरात गट पुन्हा एका व्यासपीठावर एकाच व्यासपीठावर

खुटबाव, ता. ३ : दौंड तालुक्यात पारंपरिक विरोधक समजले जाणारे आमदार राहुल कुल व माजी आमदार रमेश थोरात यांचे कार्यकर्ते सुमारे दहा वर्षानंतर प्रचारानिमित्त एका व्यासपीठावर येत आहेत.
बारामती लोकसभा मतदारसंघात सन २०१४ च्या निवडणुकीमध्ये सुप्रिया सुळे विरुद्ध महादेव जानकर यांच्यामध्ये लढत झाली होती. त्यावेळी तत्कालीन आमदार रमेश थोरात व विद्यमान आमदार राहुल कुल हे सुप्रिया सुळे यांचे काम करीत होते. त्यामुळे दोन्ही गटाचे कार्यकर्ते एकाच व्यासपीठावर होते. त्यानंतर राहुल कुल यांनी राष्ट्रवादी कॉंग्रेसशी फारकत घेतली. तेव्हापासून गेली १० वर्षे दोन्ही गट परस्पर विरोधात अनेक निवडणुका लढले.
राहुल कुल यांनी राष्ट्रवादीतून बाहेर पडल्यानंतर सुरवातीला विधानसभेवेळी राष्ट्रीय समाज पक्षात प्रवेश करून विजयही मिळवला. मात्र, त्यानंतर मागील लोकसभा निवडणुकीवेळी त्यांच्या पत्नी कांचन कुल या बारामती लोकसभा मतदारसंघातून भाजपकडून उमेदवार झाल्या. त्यात त्यांना अपयश आले. मात्र, त्यानंतर राहुल कुल यांनी विधानसभा निवडणुकीवेळी भाजपमध्ये प्रवेश केला.
दरम्यान, राष्ट्रवादीचे नेते अजित पवार हे महायुतीत सहभागी झाले. त्यांच्या पत्नी सुनेत्रा पवार या आता बारामती लोकसभा मतदारसंघातील राष्ट्रवादी काँग्रेसच्या उमेदवार आहेत. त्यांच्या प्रचारासाठी दहा वर्षानंतर प्रथमच कुल व थोरात या दोन्ही गटाचे कार्यकर्ते एकाच व्यासपीठावर येत आहेत.