ज्येष्ठांची १०० टक्के मतदान करण्याची शपथ

मंचर, ता.१२: शिरूर लोकसभा मतदारसंघातील मंचर (ता.आंबेगाव) येथे ज्येष्ठ नागरिक संघाने सोमवारी (ता.१३) होणाऱ्या निवडणूक मतदानात १०० टक्के सहभागी होण्याचा निर्णय जाहीर केला. त्यासाठी ज्येष्ठ नागरिकांनी सामूहिक प्रतिज्ञा घेतली. यावेळी त्यांनी ‘आम्ही मतदान करणारच, तुम्ही पण मतदान करा.’ अशा घोषणा दिल्या.
यावेळी संघाचे अध्यक्ष बाळासाहेब खानदेशे, उपाध्यक्ष अंजनी थोरात, सचिव ज्ञानेश्वर शेटे, कोषाध्यक्ष अरुण लोंढे, बाळासाहेब पोखरकर व ज्येष्ठ नागरिक संघातील सभासद उपस्थित होते. सदस्य चित्तरंजन भालचंद्र कोरे यांनी सामूहिक शपथ दिली. “आम्ही भारताचे नागरिक , लोकशाही वर निष्ठा ठेवून प्रतिज्ञा करतो की, आपल्या देशाच्या लोकशाही परंपरांचे जतन करू आणि मुक्त, निपक्षपाती व शांततापूर्ण वातावरणातील निवडणुकांचे पावित्र्य राखू व प्रत्येक निवडणुकीत निर्भयपणे तसेच धर्म, वंश, जात, समाज, भाषा यांच्या विचारांच्या प्रभावाखाली न येता किंवा कोणत्याही प्रलोभनास बळी न पडता १०० टक्के मतदान करू....!” या उपक्रमाचे नागरिकांकडून स्वागत केले जात आहे.

19336