भोरमध्ये साडेआठ तासांच्या मिरवणुकीनंतर गणेशविसर्जन

भोर, ता. ३ : भोर शहरात साडेआठ तासांच्या गणेश विसर्जनाच्या मिरवणुकीनंतर मंगळवारी (ता. २) गणेशमूर्तींचे विसर्जन करण्यात आले. सायंकाळी साडेतीन वाजता नगरपालिका चौकातून सुरू झालेली मिरवणूक रात्री १२ वाजता संपली. मिरवणुकीदरम्यान कोणताही अनुचित प्रकार घडला नसल्यामुळे प्रशासनाने गणेशभक्तांचे व भाविकांचे कौतुक केले.
सायंकाळी साडेतीन वाजता नगरपालिका चौकात प्रशासनाच्या वतीने पहिला मानाचा गणपती असलेल्या भोईराज गणेश मंडळाच्या गणेशमूर्तीची आरती केली. नगरपालिकेचे मुख्याधिकारी गजानन शिंदे, पोलिस निरीक्षक अण्णासाहेब पवार, सहाय्यक गटविकास अधिकारी उदय जाधव यांच्या हस्ते मानाच्या गणपतीची आरती करण्यात आली. त्यानंतर मिरवणुकीस सुरुवात झाली. यावेळी पोलिस उपनिरीक्षक अनिल चव्हाण, अभय बर्गे आदी उपस्थित होते. दुसरा मानाचा गणपती नागराज तरुण मंडळ आणि वेताळ पेठ जुनी तालीम मित्र मंडळ हे तीन गणपती मार्गस्थ झाले. तीनही गणेश मंडळांनी पारंपरिक ढोल-लेझीमचे खेळ करीत मार्गक्रमण केले. त्यानंतर मात्र शहरातील इतर सर्व गणेश मंडळांच्या कार्यकर्त्यांनी डीजे वाजवत मिरवणूक काढली. मंगळवारी दिवसभरात शहरातील २९ आणि भोर पोलिस ठाण्याच्या ह‌द्दीतील २१८ सार्वजनिक गणेश मंडळांच्या गणेशमूर्तींचे विसर्जन केले. पोलिस निरीक्षक अण्णासाहेब पवार यांनी आठ पोलिस अधिकाऱ्यांसह ६५ पोलिस कर्मचारी, ३० होमगार्ड जवान आणि शीघ्र कृती दलातील कर्मचाऱ्यांच्या मदतीने शहरात कडक बंदोबस्त ठेवला.

मुस्लिम बांधवांकडून पाणीवाटप
शहरातील भोर मुस्लिम जमातीतर्फे मिरवणुकीतील सर्व गणेशभक्तांना पाणी व अल्पोपहाराचे मोफत वाटप करण्यात आले. आलेल्या प्रत्येक गणेश मंडळाच्या पदाधिकाऱ्यांचा मुस्लिम कार्यकर्त्यांनी सत्कार केला. यावेळी जमीर आतार, निसारभाई नालबंद, डॉ. इम्रान खान, तौसीफ आतार, सादिक फरास, परवेश शेख, साजिद खान, समीर आतार, राजू पटेल, रफीक शेख व इमान आतार उपस्थित होते.