सासवडला बचतगटांचे खाद्यपदार्थांचे स्टॉल

​सासवड, ता. ३ : ग्रामीण भागातील महिला बचत गटांनी एकत्र येत गणेशोत्सवानिमित्त सासवड (ता. पुरंदर) येथे खाद्य पदार्थांच्या विक्रीचा एक स्टॉल लावला होता. या उपक्रमाला नागरिकांनी प्रतिसाद दिला.
​पुरंदर पंचायत समितीच्या गटविकास अधिकारी प्रणोती श्रीश्रीमाळ आणि सासवड नगरपालिकेचे मुख्याधिकारी डॉ. कैलास चव्हाण यांच्या पुढाकाराने राज्य ग्रामीण जीवन्नोती अभियान (उमेद) अंतर्गत हा उपक्रम राबविण्यात आला होता. आंबळे गावातील ‘अंतरा’ आणि ‘निशिगंधा’ या बचत गटांच्या महिलांनी आचार्य अत्रे सांस्कृतिक भवनाजवळ हा स्टॉल उभारला होता.
​ स्टॉलमध्ये घरगुती पद्धतीचे मोदक, लाडू, शाही पोळी आणि विविध प्रकारचे पापड विक्रीसाठी ठेवले होते. या सर्व पदार्थांना ग्राहकांकडून चांगली मागणी मिळाली, अशी माहिती बचत गटाच्या सदस्या संजीवनी गायकवाड आणि प्रियांका जगताप यांनी दिली. गणेशोत्सवादरम्यान अशा प्रकारचा हा पहिलाच प्रयोग होता आणि तो यशस्वी झाल्यामुळे या महिलांना आता भीमथडीसारख्या मोठ्या महोत्सवांमध्येही सहभागी होण्याची प्रेरणा मिळाल्याचेही गायकवाड म्हणाल्या.