‘खासदार’ वाहनावर शिरूरमध्ये कारवाई

शिरूर, ता. ६ : येथील पोलिस ठाण्यासमोर शुक्रवारी (ता. १) ‘खासदार’ चिन्ह असलेली एक आलिशान मोटार (क्र. एमएच ४३ बीएन ४५४५) उभी असताना सामाजिक कार्यकर्ते नीलेश वाळूंज यांनी ही बाब वाहतूक पोलिसांच्या निदर्शनास आणून देत या वाहनावर कारवाईची मागणी केली. पोलिसांनी गुन्हा दाखल न करता पाचशे रुपये दंड करून ही मोटार सोडून दिली.
वाळुंज यांच्या तक्रारीनंतर संबंधित मोटार ताब्यात घेऊन चौकशी केली असता ती सूर्यभान एकनाथ धुरपते यांच्या मालकीची असल्याचे निष्पन्न झाली. गुन्हा नोंदविण्यास सुरवात करताच धुरपते यांनी खासदार नीलेश लंके यांच्याशी संपर्क साधला. त्यावेळी ते दिल्लीला संसद अधिवेशनात होते. त्यांनी ही गाडी माझीच असल्याचे वाळूंज यांना सांगितले. मात्र, दुसऱ्याच्या नावे मोटार असल्याचे वाळूंज यांनी त्यांच्या निदर्शनास आणून देताच, ‘आम्हाला आमच्या नावे गाड्या घेता येत नाही,’ असे ते म्हणाले.
दरम्यान, संबंधित वाहनावर गुन्हा दाखल न करता पाचशे रुपये दंड करून पोलिसांनी ही मोटार सोडून दिली. याबाबत वाळूंज यांनी तीव्र प्रतिक्रिया व्यक्त केली. याबाबत गृहराज्यमंत्री पंकज भोयर, वरिष्ठ पोलिस अधिकाऱ्यांशी संपर्क साधून रीतसर तक्रार दिली असल्याचे त्यांनी सांगितले.

नीलेश वाळूंज यांच्या तक्रारीवरून संबंधित मोटार ताब्यात घेतली असता खासदार नीलेश लंके यांनी फोन करून ही मोटार मी मुंबईत वापरतो, असे सांगितल्याने गुन्हा दाखल न करता दंडात्मक कारवाई केली. लोकप्रतिनिधी व सामाजिक कार्यकर्त्यांचा सन्मान राखून वाहनचालकाला समज देण्यात आली आहे. महाराष्ट्र शासन, खासदार, आमदार असे लोगो लावून फिरणाऱ्या, विनाक्रमांकाच्या, काळ्या काचा केलेली वाहने निदर्शनास आल्यास त्यांच्यावर कायदेशीर कारवाई केली जाईल.
- संदेश केंजळे, पोलिस निरीक्षक, शिरूर