घराचे स्वप्न होणार साकार

पुणे, ता. ११ : प्रधानमंत्री आवास योजना (ग्रामीण) टप्पा दोनअंतर्गत लाभार्थ्यांना आणखी एक संधी मिळाली आहे. घरकुलासाठी सुरू असलेल्या सर्वेक्षणास दुसऱ्यांदा मुदतवाढ देण्यात आली आहे. जिल्ह्यातील ग्रामीण भागातील घरकुलांसाठी पात्र असलेल्या कुटुंबांचे सर्वेक्षण करण्यासाठी आता १८ जूनपर्यंत मुदतवाढ देण्यात आली आहे. पक्क्या घराचे छत नसलेल्या नागरिकांना या सर्वेक्षणात सहभागी होता येणार आहे. त्यासाठी जिल्हा परिषदेने नागरिकांना स्वतः ऑनलाइन अर्जाची करण्याची सुविधा उपलब्ध करून दिली आहे. आत्तापर्यंत २२ हजार ७५४ जणांनी स्वतः ऑनलाइन अर्ज केला आहे. तसेच, ४८ हजार ८४९ कुटुंबांची नोंदणी प्रशासकीय यंत्रणेकडून करण्यात आली आहे.

दुबार नोंदणी टळणार
या सर्वेक्षणाद्वारे प्रधानमंत्री आवास योजना टप्पा दोनअंतर्गत नवीन लाभार्थ्यांची नोंदणी केली जाणार आहे. गावांमध्ये ग्रामसेवकांच्या मदतीने लाभार्थ्यांचे थेट सर्वेक्षणही करण्यात येते. तसेच ‘आवास प्लस २०२४’ या मोबाईल ॲपद्वारे लाभार्थी स्वतःहून माहिती भरू शकतात. आधार क्रमांकाचा वापर करून माहिती भरावी लागणार आहे. याअंतर्गत आधीच नोंदणीकृत लाभार्थ्यांना ॲपवर ‘नोंद आधीच घेतली आहे’ असा संदेश दिसेल. त्यामुळे एकाच व्यक्तीची दुबार नोंदणी होणार नाही.

‘माहिती अचूक भरा’
याबाबत जिल्हा ग्रामीण विकास यंत्रणेच्या प्रकल्प संचालक शालिनी कडू म्हणाल्या, ‘‘सध्या मुदतवाढ दिली आहे. काही जणांकडून चुकीची माहितीही ऑनलाइन भरल्याचे निदर्शनास आले आहे. अशी कुटुंबे पडताळणीमध्ये अपात्र ठरणार आहेत. त्यामुळे पात्र लाभार्थ्यांनी अचूक माहिती भरावी.’’

दुर्गम भागात अडचणी
घरकुलासाठी सर्वेक्षणामध्ये दुर्गम भागात नागरिकांना अडचणींचा सामोरे जावे लागत आहे. पात्र व्यक्तींना लाभ मिळण्यासाठी प्रयत्न करणे गरजेचे असून, गावपातळीवर या सर्वेक्षणाला अधिक गती देण्याची मागणी जिल्हा परिषदेच्या काही माजी पदाधिकाऱ्यांनी जिल्हा परिषदेकडे मागणी केली होती. पण, त्यामध्ये अद्याप सुधारणा झाली नसल्याचेही म्हणणे काही माजी पदाधिकाऱ्यांनी व्यक्त केले.

निवड पारदर्शक होणार
या योजनेचा लाभ मिळवण्यासाठी आधार क्रमांकासह नोंदणी करणे बंधनकारक आहे. यामुळे पात्र लाभार्थ्यांची निवड अधिक अचूक आणि पारदर्शक होईल. लाभार्थ्यांनी लवकरात लवकर नोंदणी करावी किंवा ग्रामपंचायतीत संपर्क साधून अधिक माहिती घ्यावी, असे आवाहन जिल्‍हा परिषद प्रशासनाने केले आहे.

सध्या सर्वेक्षणाला मुदतवाढ मिळाल्याने कुणीही घरापासून वंचित राहू नये, यासाठी प्रयत्न केले जात आहे. सर्व पात्र लाभार्थ्यांची नोंदणी सर्वेक्षणाच्या माध्यमातून केली जात आहे. गटविकास अधिकारी यांनी ग्रामसेवकामार्फत सर्वेक्षण वेळेत पूर्ण करून प्रमाणपत्र सादर करण्याच्या सूचना दिल्या आहेत.
- गजानन पाटील, मुख्य कार्यकारी अधिकारी, जिल्हा परिषद

प्रधानमंत्री आवास योजना दृष्टीक्षेपात
- अर्ज करण्यासाठी मुदत- १८ जूनपर्यंत
- ऑनलाइन अर्ज केलेले लाभार्थी- २२ हजार ७५४
- प्रशासनाने नोंदणी केलेली कुटुंब संख्या- ४८ हजार ८४९