पालकांनो, मुलांचे मित्र बना

नारायणगाव, ता. ९ : ‘‘सुजाण पालकत्व म्हणजे केवळ मुलांचे संगोपन करणे नाही, तर त्यांच्या शारीरिक, मानसिक, भावनिक, बौद्धिक आणि आध्यात्मिक विकासासाठी प्रयत्न करणे आहे. पाल्यांना चांगले वातावरण आणि संधी उपलब्ध करून देणे पालकांचे कर्तव्य आहे,’’ असे प्रतिपादन डॉ. प्रा. सुषमा भोसले यांनी केले.
‘सकाळ माध्यम समूहा’च्यावतीने राबविण्यात येणाऱ्या एनआयई उपक्रमातंर्गत नारायणगाव (ता. जुन्नर) येथील श्री अनंतराव कुलकर्णी इंग्लिश मीडियम स्कूल येथे पालकांसाठी ‘सुजाण पालकत्व’ या विषयावरील मार्गदर्शन संवाद कार्यशाळेचे आयोजन केले होते. त्यावेळी भोसले बोलत होत्या. या वेळी विद्यालयाच्या माध्यमिक विभागाच्या मुख्याध्यापिका अनघा जोशी, पूर्व प्राथमिक विभागाच्या मुख्याध्यापिका स्मिता कुलकर्णी, पर्यवेक्षिका वैशाली पुंडे, विलास टेंभेकर, नामदेव घोशीर, शिक्षक पालक संघाचे उपाध्यक्ष संतोष खांडगे व सहकारी शिक्षक उपस्थित होते.
प्रा. भोसले म्हणाल्या, ‘‘आपले मूल जसं आहे, तसे त्याचा स्वीकार करणे, हे सुजाण पालकत्वाचे मुख्य लक्षण आहे. त्यांना सकारात्मक प्रोत्साहन दिले पाहिजे. प्रत्येक मुलाची गरज वेगळी असते. त्यांना योग्यवेळी योग्य मार्गदर्शन मिळणे गरजेचे असते. मुलांचे भावविश्व आपण समजून घेऊन ते समृद्ध करण्यासाठी प्रयत्न करणे आवश्यक आहे. उत्तम नागरिक होण्यासाठी आपल्या मुलांना वेळसुद्धा द्यायला शिकले पाहिजे. त्यांच्याशी सकारात्मक संवाद साधायला शिकले पाहिजे.’’
सकाळ एनआयई च्यावतीने विद्यार्थ्यांसाठी विविध उपक्रम राबविले जातात. ही कार्यशाळा या उपक्रमाचा एक भाग होती. सकाळ एनआयईचे व्यवस्थापक विशाल सराफ यांनी संयोजन केले.