मुलांच्या व्हॉलीबॉलमध्ये आज अंतिम सामना

पुणे, ता. ८ ः पूनावाला फिनकॉर्प प्रस्तुत सकाळ स्कूलिंपिक्स व्हॉलीबॉल स्पर्धेमध्ये १४ वर्षांखालील मुलांच्या गटात
सिंबायोसिस, सरहद्द, मिलेनियम नॅशनल आणि धायरीच्या नालंदा स्कूलने उपांत्यपूर्व सामन्यांमध्ये दमदार विजय मिळवून उपांत्य फेरी गाठली. उपांत्य, अंतिम व तिसऱ्या स्थानासाठीचे सामने मंगळवारी (ता.९) खेळले जाणार आहेत.
डेक्कन जिमखाना येथे ही स्पर्धा सुरू आहे. राघव बनकर, हर्ष मनिहारच्या शानदार कामगिरीच्या जोरावर सिंबायोसिसने मुक्ताई मेमोरियल स्कूलचा २५-१०, २५-१९ असा पराभव केला. दुसऱ्या उपांत्यपूर्व लढतीत शर्व कर्णे, शौर्य देसाई व वंश शहाच्या उत्कृष्ट खेळाच्या बळावर मिलेनियम नॅशनल स्कूलने धायरीच्या डीएसके स्कूलला २५-१६, २५-५ असे पराभूत केले. डीएसकेच्या मंदार देशपांडे, मिहीर सुभेदार, अर्चित आदमाने यांनी खेळाने प्रेक्षकांचे लक्ष वेधले.
तिसऱ्या उपांत्यपूर्व सामन्यात सरहद्द स्कूलने कोंढवा येथील पीजीकेएम स्कूलचा २५-८, २५-१८ असा पराभव केला. विजयी संघाकडून विराज मोहिते, प्रज्वल निकम व श्रेयांश लाटूरे यांनी, तर ‘पीजीकेएम’कडून यश पटेल, चेतन चौधरी व जीत चोरडिया यांनी चांगले प्रदर्शन केले. शेवटच्या उपांत्यपूर्व लढतीत नालंदा स्कूलने फुरसंगी येथील वॉलनट स्कूलचा २५-८, २५-१० असा पराभव केला. नालंदाच्या विजयात आर्यन सहानी, अवधूत वरपे व नचिकेत साबळेचे निर्णायक योगदान राहिले.

अन्य निकाल : १४ वर्षांखालील मुले : (उपउपांत्यपूर्व फेरी) : डीएसके स्कूल, धायरी वि. वि. आर्यन्स वर्ल्ड, भिलारेवाडी २५-७, २५-१९, पीजीकेएम, कोंढवा वि. वि. अभिनव इंग्लिश मीडियम, एरंडवणे २७-२५, २५-१९, सिंबायोसिस, प्रभात रस्ता वि. वि. श्री चैतन्य स्कूल २५-७, २५-१०, वॉलनट, शिवणे वि. वि. डॉ. कलमाडी शामराव हायस्कूल, एरंडवणे २५-२१, २१-२५, १५-१२.