‘ट्रिपल व्हेसल बायपास’ शस्त्रक्रियेद्वारे सह्याद्री रुग्णालयात उपचार

पुणे, ता. ७ : सह्याद्री रुग्णालयात डॉक्टरांनी पुण्याच्या आयटी क्षेत्रातील ४८ वर्षीय रुग्‍णाच्‍या ह्रदयाची छोट्या आकाराचे छेद करून ‘ट्रिपल व्हेसल बायपास शस्त्रक्रिया’ केली. डॉ. स्मृती हिंदारिया यांनी २८ एप्रिल रोजी ही शस्त्रक्रिया केली. या शस्त्रक्रियेदरम्यान रुग्णाच्या शरीरावर शस्त्रक्रियेचा छेद कमीतकमी झाल्याने रुग्णाच्या प्रकृतीत लवकर सुधारणा होऊन हृदयाचे कार्य पूर्ववत होण्यास मदत झाली. पुण्यातील पहिल्या महिला हृदय शल्यचिकित्सकाद्वारे ही शस्त्रक्रिया केल्‍याचे रुग्‍णालयाकडून सांगण्यात आले.
या रुग्‍णाला तीन महिन्यांपासून चालताना खूप धाप लागत होती. दैनंदिन कामे करणेही अवघड झाले होते. डॉक्टरांनी त्‍यांची अँजिओग्राफी तपासणी करून त्यांना ‘ट्रिपल वेसल कोरोनरी आर्टरी डिसीज’ हा गंभीर हृदयाचा आजार झाल्याचे निदान केले. या आजारामुळे त्यांच्या हृदयाला रक्तपुरवठा करणाऱ्या तिन्ही मुख्य धमन्यांमध्ये अडथळे आले होते. त्‍यांच्या हृदयाची रक्त पंप करण्याची क्षमता ३५ टक्क्यापर्यंत खाली घसरली होती. डॉक्टरांनी त्‍यांना छातीचा पिंजरा उघडून शस्त्रक्रिया करण्याचा सल्ला दिला. परंतु रुग्‍णाने त्‍यास नकार दिल्‍याने या प्रकारची शस्त्रक्रिया करण्यात आली.