स्वच्छ सर्वेक्षण ॲपवर अभिप्राय नोंदवा : पाटील

पुणे, ता. १० : ‘‘स्वच्छ सर्वेक्षण २०२५ ग्रामीण या उपक्रमांतर्गत गावस्तरावर स्वच्छतेविषयक झालेल्या कामाबाबत नागरिकांचे अभिप्रायही जाणून घेण्यात येणार आहेत. यासाठी स्वच्छ सर्वेक्षण २०२५ मोबाईल ॲप विकसित केला आहे. नागरिकांनी त्यावर अभिप्राय नोंदवावा,’’ असे आवाहन जिल्हा परिषदेचे मुख्य कार्यकारी अधिकारी गजानन पाटील यांनी केले आहे.
ग्रामीण भागातील स्वच्छता अभियानाला अधिक गती देण्यासाठी केंद्र शासनामार्फत देशभरात स्वच्छ सर्वेक्षण ग्रामीण सरू करण्यात आले आहे. यात पुणे जिल्ह्यातील ५३ गावांची तपासणी करण्यात येऊन गुणांकन करण्यात येणार आहे. ग्रामपंचायतीमार्फत ग्राम स्तरावर उपलब्ध करून देण्यात आलेल्या सुविधांबाबत अभिप्राय नोंदविण्यासाठी एसबीएमएसएसजी २०२५ हे ॲप डाऊनलोड करावे लागणार आहे. ॲपचा वापर करताना प्राथमिक माहितीनंतर गावातील शौचालय सुविधा, घनकचरा व सांडपाणी व्यवस्थापन यासारख्या स्वच्छताविषयक मुद्द्यांशी संबंधित तेरा प्रश्न विचारले जातील. नागरिकांनी दिलेले सकारात्मक अभिप्राय गावाच्या स्वच्छतेविषयी महत्त्वाचे ठरणार आहेत. या उपक्रमासाठी गटविकास अधिकारी, तालुका आरोग्य अधिकारी, बालविकास प्रकल्प अधिकारी, गटशिक्षणाधिकारी, महाविद्यालयांचे प्राचार्य आणि जिल्हा परिषदेतील विभाग प्रमुखांनी योग्य नियोजन करून अधिकाधिक नागरिकांचे अभिप्राय ॲपव्दारे नोंदविण्यास सांगावे, अशा सूचनाही पाटील यांनी केल्या आहेत.