लम्पीमुळे जिल्हा ‘नियंत्रित क्षेत्र’ घोषित

पुणे, ता. २३ : जिल्ह्यात लम्पी त्वचारोगाचा प्रादुर्भाव झपाट्याने वाढत आहे. प्रादुर्भाव रोखण्यासाठी जिल्ह्यात जनावरांच्या वाहतुकीसाठी नियमावली तयार करण्यात आली आहे. वाहतूक करताना लसीकरणाचे प्रमाणपत्र सोबत ठेवणे बंधनकारक केले आहे. याशिवाय लम्पीवर नियंत्रण आणि निर्मूलन करण्यासाठी पुणे जिल्हा लम्पी त्वचारोगासाठी ‘नियंत्रित क्षेत्र’ म्हणून घोषित करण्यात आले आहे.

पुण्यामध्ये लम्पी त्वचारोगाची बाधा झालेल्या जनावरांची संख्या एक हजाराच्या घरात गेली आहे. त्यामध्ये सध्या सुमारे तिनशे जनावरांवर उपचार सुरू आहेत. लम्पीचा वाढता वेग लक्षात घेता जिल्हाधिकारी जितेंद्र डुडी यांनी संपूर्ण पुणे जिल्हा हा लम्पी त्वचारोगासाठी नियंत्रित क्षेत्र म्हणून घोषित केला आहे. मागील साथींचा अनुभव लक्षात घेऊन सध्यातरी कुठल्याही शर्यती, जनावरांचे बाजार यांच्यावर बंदी घालण्यात आलेली नाही. मात्र, त्यासाठी नियमावली तयार केली आहे. जनावर सध्या ज्या ठिकाणी पाळले आहे, त्याठिकाणाहून दुसरीकडे घेऊन जायचे असल्यास वाहतूक करण्याच्या अगोदर २८ दिवसांपूर्वी लम्पीसाठी प्रतिबंधात्मक म्हणून देण्यात येणारी शेळीच्या देवीची (गोट पॉक्स) लसीकरण केल्याचे प्रमाणपत्र सोबत बाळगणे बंधनकारक करण्यात आले आहे. याशिवाय बाधित जनावराच्या संपर्कात आलेली कोणत्याही प्रकारची वैरण, निवाऱ्यासाठी असलेले गवत किंवा इतर साहित्य यासह बाधित जनावराचे शव नियंत्रित क्षेत्राच्या बाहेर घेऊन जाण्यास बंदी घालण्यात आली आहे.

पशुपालकांना ही घ्यावी दक्षता
- जनावरांचे बाजार भरवणे आणि बाजारातील खरेदी विक्री करताना २८ दिवसांपूर्वी लम्पी त्वचारोगासाठीची प्रतिबंधात्मक लसीकरण केल्याचे प्रमाणपत्र आणि पशुवैद्यकीय अधिकाऱ्यांचे आरोग्य दाखला देणे बंधनकारक.
- शर्यती, जत्रा, प्रदर्शन आयोजित करण्याच्या प्रसंगी सहभागी होणाऱ्या गोवर्गीय जनावरांचे २८ दिवसांपूर्वीचे लसीकरण प्रमाणपत्र आणि अधिकाऱ्यांचा दाखला बंधनकारक.
- नमुना तपासणीमध्ये लम्पी निष्पन्न झाल्यास त्या ठिकाणापासून पाच किलोमीटर परिघात संक्रमित न झालेल्या जनावरांचे लसीकरण तातडीने केले जाणार.

तातडीने डॉक्टरांची नियुक्ती...
बाधित क्षेत्रामध्ये पशुवैद्यकांची (डॉक्टर) रिक्त असल्याने लम्पीचा प्रादुर्भावमुळे पशुपालकांना नुकसान सहन करावे लागत होते. अशी ठिकाणे निश्चित करून त्या ठिकाणी तातडीने ४२ डॉक्टरांची नियुक्तीचे आदेश पशुसंवर्धन विभागाने दिले आहेत. या डॉक्टरांना किमान पुढील २१ दिवस नियुक्तीच्या ठिकाणी लम्पी निर्मूलनासाठी काम करावे लागणार आहे.

जिल्हाधिकाऱ्यांनी पुणे जिल्हा ‘नियंत्रित क्षेत्र’ म्हणून घोषित केला आहे. त्यानुसार नियमावली जाहीर करण्यात आली आहे. पशुपालकांना जनावरांची ने-आण करण्यासाठी लसीकरणाचे प्रमाणपत्र आणि अधिकाऱ्यांना दिलेला दाखला सोबत ठेवणे बंधनकारक करण्यात आले आहे.
- डॉ. अंकुश परिहार, जिल्हा पशुसंवर्धन उपायुक्त