वर्षानुवर्षे माजी लोकप्रतिनिधींचे नामफलक ''जैसे थे''

माजी लोकप्रतिनिधींना सुटेना नामफलकाचा मोह

पदाचा कालावधी संपूनही फलक ‘जैसे थे’; शहराच्या विद्रुपीकरणात भर

मंगेश पांडे ः सकाळ वृत्तसेवा
पिंपरी, ता. १० : अमुक सभापती यांच्या निवासस्थानाकडे, अमुक सदस्य यांच्या संपर्क कार्यालयाकडे असा मजकूर लिहिलेले रस्त्यालगत उभारलेले फलक पावलोपावली पाहायला मिळत आहेत. यावर नाव नमूद असलेल्या संबंधित व्यक्तीच्या पदाचा कालावधी संपून अनेक वर्षे उलटल्यानंतरही हे फलक रस्त्यालगत ‘जैसे थे’च असल्याचे दिसून येते. यामुळे शहराच्या विद्रुपीकरणात भर पडत असतानाही त्याकडे दुर्लक्ष केले जात असल्याचे दिसून येते.
एखाद्या पदावर निवड झाल्यानंतर संबंधित लोकप्रतिनिधीच्या नावाचा फलक घराजवळ तसेच घराच्या दिशेने येणाऱ्या आजूबाजूच्या रस्त्यालगत उभा केला जातो. लोकप्रतिनिधींचे नाव, त्याखाली पद व नंतर दिशादर्शक बाण दाखवून संबंधित लोकप्रतिनिधीच्या घराकडे अथवा संपर्क कार्यालयाकडे असे त्यावर नमूद केलेले असते. दरम्यान, संबंधित लोकप्रतिनिधीच्या पदाचा कालावधी संपल्यानंतर हा फलक हटविणे आवश्यक आहे. मात्र, पदाचा कालावधी संपून वर्षानुवर्षे लोटल्यानंतरही रस्त्यालगतचे फलक हटविण्याची मानसिकता होत नसल्याचे दिसून येते. त्यामुळेच पिंपरी-चिंचवड शहराच्या विविध भागातील रस्त्यालगत माजी लोकप्रतिनिधींचे फलक पाहायला मिळत आहेत.

पदाचा मोह सुटेना
संबंधित व्यक्तीच्या पदाचा कालावधी संपून मोठा कालावधी लोटलेला असतो. मात्र, पदाचा मोह सुटत नसल्याने आपल्या नावाचा फलक कायम असावा, असे संबंधित व्यक्तीला वाटत असते. त्यामुळे असे फलक वर्षानुवर्षे असेच झळकत राहतात.

ग्रामपंचायत काळातील फलक आजही
महापालिकेत काही गावे समाविष्ट झाली. त्यापूर्वी त्या गावांमध्ये ग्रामपंचायत असल्याने तेथे सरपंच व ग्रामपंचायत सदस्य पद होते. त्यावेळी संबंधित लोक प्रतिनिधींनी उभारलेले यांच्या नावाचे फलक आजही त्याच स्थितीत असल्याचे दिसून येते. अनेक वर्षे उलटल्यानंतर तसेच संबंधित गावे सध्या महापालिकेत आली असतानाही काही ठिकाणी सरपंच पदाचे फलक नजरेस पडतात.

याठिकाणी आहेत फलक
निगडी, आकुर्डी, चिंचवड, भोसरी, थेरगाव, दिघी, तळवडे, चऱ्होली, थेरगाव, रहाटणी, पिंपरी, वाकड, काळेवाडी, रावेत, चिखली, सांगवी, कासारवाडी, गहुंजे, वाल्हेकरवाडी, मोरवाडी, खराळवाडी आदी भागात अशा प्रकारचे फलक पाहायला मिळतात.

पदाचा कालावधी संपल्यानंतर संबंधित लोकप्रतिनिधीचा फलक हटविणे आवश्यक आहे. मात्र, शहरातील अनेक रस्त्यालगत माजी लोक प्रतिनिधींच्या नावाचे फलक पाहायला मिळत आहेत. अशा फलकांवर कारवाई करून ते हटविणे आवश्यक आहे.
- सुनील राजेभोसले, नागरिक