‘मुळा’ मे महिन्यात थडी भरून वाहू लागली

पिरंगुट, ता. २७ : गेल्या पंधरा दिवसांत मुळशी तालुक्यात पावसाने धुमाकूळ घातला असल्याने शेतीसह घरांचे तसेच अन्य मालमत्तेचे मोठ्या प्रमाणावर नुकसान झाले आहे. मे महिन्यात येथील मुळा नदीला पूर येण्याची घटना अनेक वर्षानंतर पहिल्यांदाच झाली आहे. यावर्षी मुळा नदीला मोठा पूर आला असून या हंगामात प्रथमच दुथडी भरून वाहू लागली आहे. त्यामुळे काठावरील कृषीपंपांचे नुकसान झाले आहे.
मुळशी तहसील कार्यालयाने दिलेल्या माहितीनुसार, मुळशीत मंगळवारी (ता. २७) सकाळी सात वाजता घेतलेल्या नोंदीनुसार झालेला पाऊस मिलिमीटरमध्ये पुढीलप्रमाणे - पौड - ६६ , पिरंगुट - ६१ , घोटावडे - ७१, थेरगाव - ७७, माले - ७५, मुठा - ७०. त्यामुळे मंगळवारच्या सकाळच्या नोंदीनुसार मुळशीत सरासरी ७० मिलिमीटर इतका पाऊस झाला आहे.
गेल्या १३ मे पासूनचा विचार केल्यास मुळशीत आजअखेर सरासरी २७७ मिमी इतका पाऊस झाला आहे. १३ मे रोजी मुळशीतील थेरगाव येथे ९८ मिमी इतका पाऊस कोसळलेला असून त्याच दिवशी मुठा येथे ८५ मिमी इतका पाऊस पडलेला आहे. मात्र असे असूनही सोमवारी (ता. २६) तालुक्यात पडलेला पाऊस हा या महिन्यातील आजपर्यंतचा उच्चांकी नोंद झालेला पाऊस आहे. १३ मे पासून २६ मे अखेर तालुक्यातील मंडलनिहाय पडलेला पाऊस मिलीमीटरमध्ये पुढीलप्रमाणे : पौड - २४१, पिरंगुट - २६४, घोटावडे - २६२, थेरगाव - ३८०, माले - २३६ तर मुठा - २८०. त्यामुळे थेरगाव या मंडलात सर्वाधिक म्हणजे ३८० मिमी इतका पाऊस झाला आहे.