किल्ल्यांकडे जाणाऱ्या रस्त्यांसाठी आराखडा तयार करावा : मांडेकर

पिरंगुट, ता. ६ : गड किल्ल्यांकडे जाणाऱ्या रस्त्यांसाठी राज्यस्तरीय समग्र विकास आराखडा तयार करावा. मुळशी, भोर आणि वेल्हे या भागात अनेक शिवकालीन गडकिल्ले आहेत, परंतु त्या ठिकाणी जाण्यासाठी रस्ते नाहीत. या रस्त्यांची सुधारणा करावी जेणेकरून येथील पर्यटनाला चालना मिळेल, अशी मागणी आमदार शंकर मांडेकर यांनी विधानसभेत केली.
महाराष्ट्र विधिमंडळाच्या पावसाळी अधिवेशनात लक्षवेधी सूचना मांडून ही मागणी केली आहे. त्यांनी म्हटले की, भोर विधानसभा मतदारसंघात असलेल्या ऐतिहासिक शिवकालीन गडकिल्ल्यांकडे जाणाऱ्या रस्त्यांची दयनीय अवस्था झाली आहे. त्यामुळे पर्यटन विकासाला अडथळा निर्माण झाला आहे. हे किल्ले महाराष्ट्राच्या सांस्कृतिक, ऐतिहासिक आणि पर्यटन वारशाचा अत्यंत महत्त्वाचा भाग आहेत. परंतु, या किल्ल्यांपर्यंत जाणाऱ्या रस्त्यांची अवस्था अत्यंत दयनीय आहे. त्यामुळे स्थानिक नागरिक व पर्यटकांना मोठ्या अडचणींना सामोरे जावे लागत आहे. या संपूर्ण परिसरातील गडकिल्ल्यांशी संपर्क साधणारे स्वतंत्र रस्ते, तसेच मुख्य रस्त्यांशी जोडणारे मार्ग यांचा समावेश असलेला एक राज्यस्तरीय समग्र विकास आराखडा तयार होणे अत्यंत गरजेचे आहे. पर्यटन वाढ, स्थानिक अर्थव्यवस्थेचा विकास आणि ऐतिहासिक वारशाचे जतन या महत्त्वाच्या उद्दिष्टांतून हा विषय शासनाने गंभीरपणे विचारात घ्यावा. या आराखड्यासाठी पर्यटन विभाग, सार्वजनिक बांधकाम विभाग, सांस्कृतिक कार्य विभाग आणि जिल्हा परिषद प्रशासन यांच्या समन्वयाने संयुक्त कृती आराखडा तयार करावा.
याशिवाय, वेल्हे तालुक्यातील मढे घाट, भोर तालुक्यातील वरंधा घाट आणि भोर-मांढरदेवी मार्गाचे निकृष्ट दर्जाचे काम झालेले आहे. त्यासंबंधी तातडीच्या उपाययोजनांची आवश्यकता आहे. वेल्हेमार्गे महाडकडे जाणारा राज्य मार्ग क्रमांक ६५ मढे घाटातून विकसित करणे अत्यंत गरजेचे आहे. तसेच शिंदेवाडी- वरंधा घाट व कापूरहोळ- भोर- मांढरदेवी रस्त्याचे कामकाज गेल्या अनेक वर्षांपासून सुरू असूनही अत्यंत निकृष्ट दर्जाचे असून अजूनही पूर्ण झालेले नाही. पावसाळ्यात दरड कोसळण्याचे प्रकार वारंवार घडतात आणि अनेक मार्ग बंद होतात. त्यामुळे नागरिकांच्या जीवितास धोका निर्माण होतो व परिसराचा संपर्क तुटतो. या बाबी शासनाने अत्यंत गांभीर्याने लक्षात घेऊन तातडीने उपाययोजना कराव्यात, अशी मागणी केली.