हिंजवडीच्या वाहतुकीसाठी प्राधिकरण करा : मांडेकर

पिरंगुट, ता. ८ : हिंजवडी (ता. मुळशी) येथील वाहतूक समस्येकडे सरकारने गांभीर्याने पाहून त्यावर तातडीने उपाययोजना करावी. त्यासाठी हिंजवडीसाठी स्वतंत्र वाहतूक नियोजन प्राधिकरण तयार करावे, अशी मागणी आमदार शंकर मांडेकर यांची विधानसभेत केली.
याबाबत मांडेकर विधानसभेत म्हणाले, ‘‘हिंजवडी येथे वाहतूक कोंडीची समस्या खूपच वाढली आहे. बस वेळेवर येत नसल्यामुळे लोक खासगी वाहनांचा जास्त वापर करतात. त्यामुळे वाहतूक अजून वाढते. रस्ते अरुंद आहेत, अनेक ठिकाणी खड्डे व अपूर्ण कामे चालू आहेत. मेट्रो प्रकल्प अजून पूर्ण झालेला नाही. वाहतूक पोलिस, रस्ते विकास आणि स्थानिक प्रशासन यांच्यात समन्वयाचा अभाव आहे. त्यामुळे हिंजवडीसाठी स्वतंत्र वाहतूक नियोजन प्राधिकरण तयार करावे. बस सेवा वाढवावी, आणि मेट्रो मार्ग लवकर पूर्ण करावा. स्मार्ट सिग्नल, सीसीटीव्ही, तंत्रज्ञान वापरून वाहतूक नियंत्रण करावे. वाहतूक पोलिसांची संख्या वाढवावी आणि रस्त्यांची कामे जलदगतीने पूर्ण करावीत. उड्डाणपूल, भुयारी मार्ग आणि पर्यायी रस्त्यांचे काम तातडीने सुरू करावे. ही समस्या केवळ वाहतूक कोंडीची नाही, तर राज्याच्या औद्योगिक विकास, नागरिकांचे आरोग्य आणि कामकाजाच्या कार्यक्षमतेशी जोडलेली आहे. त्यामुळे सरकारने याकडे गांभीर्याने पाहून तातडीने उपाययोजना कराव्यात.’’