कंपन्यांचा ‘सीएसआर’ तालुक्यातच खर्च करा

पिरंगुट, ता. २५ : मुळशी तालुक्यातील सुशिक्षित बेरोजगार युवकांना तसेच अकुशल कामगारांना व नवउद्योजकांना रोजगार उपलब्ध करून द्यावा व तालुक्यातील कंपन्यांचा सामाजिक दायित्व निधी तालुक्यातीलच शैक्षणिक कारणांसाठी खर्च करावा, अशी मागणी मुळशी तालुका काँग्रेस कमिटीने मुळशी तालुका इंडस्ट्रिअल असोसिएशनकडे केली आहे.
तालुक्यातील सुशिक्षित बेरोजगार युवक, अकुशल कामगार तसेच नवउद्योजकांना तालुका इंडस्ट्रिअल असोसिएशनच्या माध्यमातून विविध कंपन्यांमध्ये रोजगार मिळवून दिला पाहिजे. कंपन्यांमधील विविध विभागांतील कामे तालुक्याबाहेरील लोकांना दिली जातात, त्याऐवजी लेबर कॉन्ट्रॅक्ट, ट्रान्सपोर्ट व्यवसाय, प्रिंटिंग स्टेशनरी पुरविणे, हाउसकीपिंगची कामे, सुरक्षारक्षक, कच्चा माल पुरवणे, कंपनीच्या गार्डनची कामे, कंपनीमधील कॅन्टीन चालविणे आदी कामे तालुक्यातील तरुणांनाच द्यावीत, असे तालुका इंडस्ट्रिअल असोसिएशनला दिलेल्या निवेदनात म्हटले आहे.
तालुका काँग्रेस कमिटी तालुका इंडस्ट्रिअल असोसिएशनच्या पाठीमागे पूर्ण क्षमतेने उभी राहणार असून, उद्योजकांच्या विविध समस्या सोडविण्याचा प्रयत्न करणार असल्याचे आश्‍वासन कमिटीचे अध्यक्ष सुरेश पारखी व कार्याध्यक्ष सचिन किर्वे यांनी तालुका इंडस्ट्रिअल असोसिएशनचे अध्यक्ष सतीश करंजकर यांना दिले.
यावेळी कमिटीचे भोर विधानसभा काँग्रेस कमिटीचे अध्यक्ष एकनाथ खोले, कमिटीचे खजिनदार रमेश पानसरे, युवा नेते महेश मोहोळ आदी उपस्थित होते.