घोटावड्यात भुयारी मार्गासाठी उपमुख्यमंत्री पवार यांना निवेदन

पिरंगुट, ता. २८ : घोटावडे फाटा (ता. मुळशी) येथे भुयारी मार्ग मंजूर करण्याची मागणी आमदार शंकर मांडेकर यांनी उपमुख्यमंत्री अजित पवार यांच्याकडे केली आहे. पुणे महानगर प्रदेश विकास प्राधिकरण येथे आयोजित केलेल्या बैठकीत मांडेकर यांनी याबाबतचे लेखी निवेदन दिले.
आमदार मांडेकर यांनी दिलेल्या निवेदनात म्हटले आहे की, मुळशी तालुक्यातील चांदणी चौक ते ताम्हिणी रस्त्यावरील वसलेला घोटावडे फाटा हा भाग दिवसेंदिवस रहदारीने गजबजलेला ठरत आहे. या रस्त्याचा वापर पुणे शहर व पिरंगुट औद्योगिक वसाहतीकडे जाण्यासाठी हजारो वाहनचालक करतात. या ठिकाणी मोठ्या प्रमाणावर वाहतूक कोंडी निर्माण होते. यामुळे अपघात होण्याची शक्यता वाढते. घोटावडे फाटा या ठिकाणी भुयारी मार्ग तयार झाल्यास वाहतूक कोंडी कमी होईल. नागरिकांचा वेळ आणि इंधन वाचेल.
दरम्यान, महाराष्ट्र रस्ते विकास महामंडळ विभागास त्वरित आदेश देऊन घोटावडे फाटा येथे भुयारी मार्ग तयार करण्यासाठी कार्यवाही करण्यात येईल, असे आश्वासन उपमुख्यमंत्री पवार यांनी दिले आहे.