मुठा नदीकाठी सतर्कतेचा इशारा

पिरंगुट, ता. १६ : जलसंपदा विभागाने मुठा नदीकाठच्या नागरिकांना सतर्कतेचा इशारा दिला आहे. याबाबतचे जाहीर निवेदन भामा आसखेड धरण विभागाचे कार्यकारी अभियंता एन.एस. करे यांनी प्रसिद्ध केले आहे.
टेमघर धरण पाणलोट क्षेत्रात जोरदार पर्जन्यवृष्टी होत आहे. त्यामुळे धरण शनिवारी (ता. १६) सायंकाळी पाच वाजता ९५.६ टक्के भरले. धरण क्षेत्रात पावसाचे प्रमाण पाहता व येवा वाढत असल्याने धरण शंभर टक्के भरू शकते व धरणाच्या सांडव्यावरून अनियंत्रित पाण्याचा विसर्ग नदी पात्रात होऊ शकतो. दरम्यान, रविवारी (ता. १७) सकाळी आठपासून जलविद्युत निर्मिती केंद्रातून ३०० क्यूसेक इतका विसर्ग नदीपात्रात होणार आहे. तरी मुठा नदी काठच्या नागरिकांना याद्वारे सूचित करण्यात येते की, कृपया नदीपात्रात कोणीही उतरू नये. नदीमधील शेती पंप, नदी काठचे शेती अवजारे व तत्सम साहित्य अथवा जनावरे असल्यास तत्काळ हलविण्यात यावेत, असे आवाहन करे यांनी केले आहे.