भरे, मुलखेड येथे दोन तरुण बुडाले

पिरंगुट, ता. २ : गणेश विसर्जनासाठी मुळा नदीच्या पाण्यात उतरलेले दोन तरुण वाहून गेल्याने बेपत्ता झाले आहेत. सोमवारी (ता. १) रात्री एक तरुण, तर मंगळवारी संध्याकाळी एक तरुण वाहून गेला आहे. अद्याप त्यांचा शोध लागलेला नाही. आजही एक तरुण वाहून गेला आहे. लक्ष्मण हनुमान चव्हाण (वय २३) व अजिंक्य दिगंबर त्रिबंके (वय १९), अशी वाहून गेल्याने बेपत्ता झालेल्या तरुणांची नावे आहेत.
याबाबत पौड पोलिस ठाण्याचे हवालदार दीपक पालखे यांनी माहिती दिली की, भरे (ता. मळशी) येथील मुळा नदीचा विसर्जन घाट येथे पिरंगुट येथील आस्था हॅास्पीटलमध्ये काम करणारा मुलगा लक्ष्मण हनुमान चव्हाण (वय २३) हा मंगळवारी सायंकाळी साडेपाच वाजण्याच्या सुमारास मुळा नदीच्या पाण्यामध्ये वाहून गेला. आपत्ती व्यवस्थापन पथकाचे प्रमोद बलकवडे यांच्या मदतीने त्याचा शोध घेण्याचे काम सुरू आहे.
दरम्यान, सोमवारी मुलखेड या ठिकाणी मुळा नदीमध्ये अजिंक्य दिगंबर त्रिबंके (वय १९. रा. फेस थ्री, हिंजवडी) हा पाण्यात बुडाला होता. रात्री माहिती मिळताच वरिष्ठ पोलिस निरीक्षक संतोष गिरीगोसावी यांच्या आदेशानुसार पोलिस हवालदार पालखे व दत्तात्रेय अर्जुन यांनी भेट देऊन ठिकाणाची पाहणी केली. मंगळवारी पोलिस पथक, पीएमआरडीएचे अग्निशमन दल व मुळशी आपत्ती व्यवस्थापन समिती यांच्या संयुक्त वतीने शोध मोहीम राबवून शोध घेण्यात आला. परंतु अद्याप त्याचा शोध लागलेला नाही.