माजी विद्यार्थ्यांकडून घोटावडे शाळेस मदत

पिरंगुट, ता. ९ : घोटावडे (ता. मुळशी) येथील पुणे जिल्हा शिक्षण मंडळाच्या न्यू इंग्लिश स्कूलमध्ये २००० - २००१ या शैक्षणिक वर्षात दहावीत शिक्षण घेतलेल्या विद्यार्थ्यांचा रविवारी (ता. ७) स्नेहमेळावा पार पडला. यावेळी विद्यार्थ्यांकडून शाळेस दोन हजार लिटर क्षमतेची पाणी साठवण टाकी व ठिबक सिंचनासह नक्षत्रबन तयार करण्यात आले.
नक्षत्रबनासाठी विद्यार्थ्यांच्या वतीने वड, पिंपळ, नांदुरकी, आवळा, फणस, नागकेशर, बेल, उंबर, अर्जुन, अडुळसा, जांभूळ, चिंच, बकुळ, पळस, कळंब, देव बाभूळ, सावर, सायर, खैर आदी वृक्षांची लागवड करण्यात आली. चांदे येथील महिला भजनी मंडळाच्या वारकरी दिंडीने शिक्षकांचे स्वागत करण्यात आले. यावेळी शिक्षक व विद्यार्थ्यांनी मनोगत व्यक्त करून आठवणींना उजाळा दिला. याप्रसंगी तत्कालीन मुख्याध्यापक नामदेव चित्ते, सीताराम पाटील, गुलाब जाधव, धोंडिबा कुंभार, दत्तात्रेय वणवे, सतीश ताकवले, दीपक साळुंके, संगीता शिनगारे आदी उपस्थित होते. माजी विद्यार्थी पोपट तापकीर, महेश वायकर, सोमनाथ तापकीर, रोहिदास भेगडे, सागर गोडांबे आदींनी कार्यक्रमाचे नियोजन केले.