घोटावडे परिसरातील पान टपऱ्यांतून चोरी

पिरंगुट, ता. ४ : घोटावडे (ता. मुळशी) परिसरात चोरट्यांनी सोमवारी (ता. ४) पहाटे चार वाजण्याच्या सुमारास काही पान टपऱ्या, तसेच अन्य छोट्या टपऱ्या फोडून त्यातील किरकोळ मालांची चोरी केली. त्यात सुमारे अठरा ते वीस हजार रुपयांहून अधिक रकमेचा माल चोरी गेला.
याबाबत पौड पोलिस ठाण्याचे सिद्धेश पाटील यांनी माहिती दिली की, घोटावडे येथील हनुमान चौक, शेळकेवाडी चौक, तसेच अन्य भागातील टपऱ्या व छोट्या दुकानातील मालांची चोरी केली. चोरट्यांनी दोन टपऱ्या फोडल्या व तिसरी टपरी फोडण्याचा प्रयत्न केला. या परिसरातील काही सीसीटीव्ही फुटेज पाहिले असता त्यात दोन चोरटे चोरी करताना दिसून येत आहेत.
याबाबत काही स्थानिकांनी सांगितले की, शासनाने दुकानात गुटखा पदार्थांच्या विक्रींवर बंदी घातली आहे. असे पदार्थ सापडले तर थेट गंभीर गुन्हे दाखल करण्यात येतो. त्यामुळे याच भीतीपोटी चोरी होऊनही दुकानदार गुन्हा दाखल करण्यास धजावत नाहीत. त्यामुळे चोरटे पान टपऱ्या फोडण्याचे धाडस करीत आहेत.
दरम्यान, या परिसरात रात्रीच्या वेळी पोलिसांनी गस्त घालावी, अशी मागणी स्थानिकांनी केली आहे.