पिलाणवाडी जलाशयातून कोरडे बंधारे भरा

परिंचे, ता. ८ : परिंचे (ता.पुरंदर) परिसरात लेंडी ओढ्यावर असलेले बारा साखळी बंधारे पिलाणवाडी जलाशयातून वाहून जाणाऱ्या पाण्यातून भरावेत, अशी मागणी लघू पाटबंधारे विभागाचे शाखा अभियंता अविनाश जगताप यांच्याकडे शेतकऱ्यांनी केली आहे. जलाशयातील पाण्यामुळे परिसरातील शंभरहून अधिक विहिरींना फायदा होणार असल्याचे शेतकरी हनुमंत सोळसकर यांनी सांगितले.

लघू पुरंदर तालुक्यात असलेल्या लघु पाटबंधारे तलावामधील पिलाणवाडी जलाशय असून तालुक्यात सर्वात शेवटी भरणारा जलाशय या वर्षी मात्र मे महिन्यात ओसंडून वाहत आहे. रुद्रगंगा नदी उन्हाळ्यात भरून वाहत असून नदी काठावरील विहिरी काठोकाठ भरल्या आहेत. परिंचे गावच्या पूर्व भागातील बंधारे अजूनही कोरडे आहेत हे बंधारे वाहून जाणाऱ्या पाण्यातून भरल्यास परिसरातील शेतीच्या पाणीपातळी वाढ होणार आहे .पिलाणवाडी जलाशयातून परिंचे परिसरातील शेतीला बंद जलवाहिनीद्वारे पाणीपुरवठा करण्यासाठी साडेचार कोटींची नावीन्यपूर्ण योजना राबविण्यात आली आहे याच योजनेच्या माध्यमातून ओढे, नाले तसेच बंधारे भरण्याची व्यवस्था करण्यात आली आहे.

लघु पाटबंधारे विभागाच्या अधिकाऱ्यांनी असा उपक्रम राबविल्यास परिंचे गावासह नवलेवाडी गावाला देखील या उपक्रमाचा लाभ होऊन भूजल पातळीत मोठ्या प्रमाणात वाढ होणार असल्याचे सरपंच अर्चना राऊत यांनी सांगितले.
दरम्यान, विजय शिवतारे जलसंपदा मंत्री असताना ही योजना मंजूर करण्यात आली असून, पाणी उपलब्ध असताना शेतकऱ्यांच्या मागणीनुसार पुरवठा करणे बंधनकारक असल्याचे शिवसेना नेते मयूर मुळीक यांनी सांगितले आहे.

अभियंता जगताप यांच्याशी चर्चा करताना उपसरपंच प्रवीण जाधव, संभाजी जाधव, शशिकांत जाधव, विजय जाधव, अतुल जाधव, माणिक वाघोले, शंकर वाघोले, यशवंत ढगे यांच्यासह मोठ्या संख्येने शेतकरी उपस्थित होते.