भलरीची गात भात लागवड वेगात

परिंचे, ता. १० : समाधानकारक मॉन्सून पूर्व पावसामुळे शेतकरी सुखावला आहे. काळदरी (ता.पुरंदर) परिसरात रिमझिम पावसात सर्वत्र भात लागवडीस वेग आला आहे.

इंद्रायणी तांदळाला मागणी असल्यामुळे शेतकऱ्यांचा कल इंद्रायणीच्या लागवडीवर जास्त असल्याचे पाहायला मिळते. इंद्रायणीबरोबर इंडम, कर्जत जाती मोठ्या प्रमाणात उत्पन्न घेतले जात असल्याचे भात उत्पादक शेतकरी स्वागत कोंढाळकर यांनी सांगितले आहे. तसेच काही ठिकाणी नाचणीची लागवड केली जात आहे.
काळदरी खोऱ्यातील कोंडकेवाडी, बांदलवाडी, खराडवाडी, काळदरी, थोपटेवाडी, चिकणेवाडी, पिसाळवाडी, शेलारवाडी, सणसवाडी, धनकवडी व दवणेवाडी भागात भात लावणीची लगबग सुरू आहे.

सध्या भात लावणीसाठी आवश्यक मजुरांची कमतरता भासत आहे अशावेळी वारंगुळा पद्धती अवलंबली जात आहे. भात लावताना भलरीची गाणी म्हणत बळीराजाला चांगले उत्पन्न मिळण्यासाठी देवाला विनवणी केली जात असल्याचे भात लागवड करणाऱ्या शेतकरी महिलांनी सांगितले. यावेळी राणी धनावडे, निशा ढवळे, नंदा धनावडे, अनुसया धनावडे, सीताबाई धनावडे, नारायण सोपान धनावडे आदी शेतकरी उपस्थित होते.

दरम्यान, मांढर परिसरात भात रोपे टाकण्याच्या वेळी संततधार पाऊस पडत असल्याने भात रोपांच्या उगवण क्षमतेवर परिणाम झाला होता उगवलेल्या रोपांवर मोठ्या प्रमाणात करपा रोगाचा प्रादुर्भाव झाल्याने रोपांच्या संख्येत मोठ्या प्रमाणात घट झाली आहे. प्रत्येक शेतकऱ्याला रोपांची कमतरता भासत असल्याचे मांढर सोसायटीचे अध्यक्ष तानाजी पापळ यांनी सांगितले आहे. रोपांची कमतरता भासत असल्याने लागवडीसाठी रोपांची शोधाशोध सुरू आहे. नसरापूर,भोर परिसरातून रोपे खरेदी करून भात लागवड करण्याची वेळ आली आहे, असे दत्तात्रेय पापळ यांनी सांगितले.

02685