मूर्ती विटंबन प्रकरणाची मुख्यमंत्र्यांकडून दखल

पौड, ता. ९ : पौड (ता. मुळशी) येथील एका धार्मिकस्थळातील मूर्तीच्या विटंबना प्रकरणी मुख्यमंत्री देवेंद्र फडणवीस यांनी कठोर कारवाईचे आश्वासन दिले आहे. पौड गावातील युवकांनी भाजपचे युवा नेते सागर मारणे यांच्या माध्यमातून मुख्यमंत्री फडणवीस यांची मुंबई येथे भेट घेतली, त्यावेळी त्यांनी संपूर्ण माहिती विचारून आश्वासन दिले.
पौड गावात २ मे रोजी एका धार्मिकस्थळातील मूर्तीच्या विटंबनेची घृणास्पद घटना घडली. त्या घटनेविषयी माहिती मुख्यमंत्री फडणवीस यांना देण्यासाठी पौडमधील केतन मखी, बाळासाहेब पवार, संजय घनवट, योगेश दळवी, रितेश जाधव, ओंकार उबाळे, मंगेश घनवट, तनीश भोकरे हे कार्यकर्ते मुख्यमंत्री कार्यालय मुंबई येथे गेले होते. मुख्यमंत्र्यांनी संपूर्ण घटनेची माहिती घेतली. तसेच, त्यांनी आरोपींना कडक शासन करण्याचे, तसेच जे काही बेकायदेशीर आहे ते मुळासकट उखडून फेकून देऊ, असे सांगितले.